LUK dis big famili. Na Jekɔb ɛn in 12 bɔy pikin dɛn. Jekɔb gɛt gyal pikin dɛn bak. Yu sabi ɛniwan in nem? Lɛ wi lan bɔt sɔm pan dɛn.

Lia bɔn Rubɛn, Simyɔn, Livay, ɛn Juda. We Rechɛl si se i nɔ de bɔn, in at pwɛl bad bad wan. So i gi in nani we nem Bila to Jekɔb, ɛn Bila bɔn tu bɔy pikin dɛn. Di pikin dɛn na Dan ɛn Naftali. Lia insɛf gi in nani we nem Zilpa to Jekɔb, ɛn Zilpa bɔn Gad ɛn Asha. Lia bɔn tu bɔy pikin dɛn bak, ɛn dɛn nem dɛn na Isaka ɛn Zɛbyulɔn.

Leta, Rechɛl insɛf bɔn pikin. I kɔl di pikin Josɛf. Wi go lan plɛnti tin bɔt Josɛf bikɔs i bin bi wan impɔtant pɔsin. Jekɔb bɔn ɔl dɛn 11 bɔy pikin ya we i bin de wit in fadɛnlɔ.

Jekɔb bin gɛt gyal pikin dɛn bak, bɔt na wan in nem nɔmɔ de na di Baybul. Na in nem Dayna.

Afta sɔm tɛm, Jekɔb tɛl Leban se i de go bak na Kenan. So i tek in big famili ɛn ɔl in animal dɛn ɛn bigin di lɔng patrol.

We Jekɔb ɛn in famili dɔn de na Kenan fɔ sɔm tɛm, Rechɛl bɔn wan ɔda bɔy pikin. I bɔn dis pikin ya we dɛn bin de travul. I nɔ bin izi fɔ Rechɛl we i bin de bɔn, so i day. Bɔt natin nɔ bin du di yɔŋ bebi. Jekɔb kɔl am Bɛnjamin.

I fayn fɔ mɛmba Jekɔb in 12 bɔy pikin dɛn nem dɛn bikɔs na dɛn bɔn ɔl di Izrɛlayt dɛn. Na tɛn pan Jekɔb in bɔy pikin dɛn nem dɛn, ɛn Josɛf in tu bɔy pikin dɛn nem dɛn, dɛn gi di 12 trayb dɛn na Izrɛl. Ayzak bin stil de we dɛn bɔn ɔl dɛn pikin ya, ɛn i go mɔs dɔn gladi fɔ si in granpikin dɛn. Bɔt lɛ wi si wetin apin wit wan pan in granpikin dɛn we na Dayna.