LOLESYA pa lupwa ulu ulukulu. Aba bana abalalume 12 abakwe Yakobi. Kabili alikwete ne bana na bambi abanakasi. Kani uliyesi amasina ya bamo bamo abana? Ngatusambilile amasina ya bamo bamo abana.

Lea alifyele Lubeni, Simyoni, Lefai na Juda. Ili Laceli abwene ati talukukwatapo abana, alibombomene makosa. Popele alipele umusya wakwe Bilya kuli Yakobi, naye Bilya alikwete abana abalalume bobilo abailicilwe ati Dani na Nafitali. Kabili Lea alipele umusya wakwe Silipa kuli Yakobi, na Silipa alifyele Gadi na Asila. Mukupita kwa mpindi Lea alikwete abana na bambi bobilo, Isaka na Sebuluni.

Mukupelako Laceli alikwete umwana. Alimwilicile ati Josefi. Pantangile tukasambilila ifingi pali Josefi, pakuti alibele muntu mucindeme. Aba ebali abana 11 abakwe Yakobi aba amufyalile Laceli ili balukwikala na Labani wisi wakwe Laceli.

Yakobi alikwete nabambi abana abanakasi, pano Baibolo ilatubula lukoso limo isina pali babo abana. Isina lyakwe ni Dina.

Impindi yalifikile ili Yakobi apingwilepo ukusya Labani ne kubwelelamo ku Kanani. Popele alibunganicile ulupwa lwakwe ulukulu ne matanga akwe aambelele ne ya ŋombe aengi, kabili alitatikileko ukuya ulwendo ulutali.

Ili Yakobi ne lupwa lwakwe babwelelemo ku Kanani mu mpindi inini, Laceli alifyele umwana naumbi. Ici calicitikile ili bali pa lwendo. Laceli alikatasiwilwe, na mukupelako alifwile pakufyalo’mwana. Pano uyu musankwa ulucece ali lukoso bwino. Yakobi alimwilicile ati Benjamini.

Tulyelelwe ukulukwanuka amasina ya bana bakwe Yakobi 12 pakuti umukoka onse uwa baIsilaeli emo wafumine. Mucinenene, ifikoto 12 ifya baIsilaeli fyalilicilwe ukufuma ku bana bakwe Yakobi ikumi ne bana bobilo abakwe Josefi. Isaci alikele imyaka iingi ili bonse aba basankwa bafyelwe, kabili cilukuboneka ati calimusangalesye ukukwata abensikulu abengi. Pano ngatubone ifyacitikile ku mwinsikulu wakwe umwanakasi Dina.

Ifyakutaŋga 29:32-35; 30:1-26; 35:16-19; 37:35.