ຍາໂຄບມີຄອບຄົວໃຫຍ່
ບົດ 19
ຍາໂຄບມີຄອບຄົວໃຫຍ່
ຈົ່ງເບິ່ງຄອບຄົວໃຫຍ່ນີ້. ຄົນເຫຼົ່ານີ້ເປັນລູກຊາຍ 12 ຄົນຂອງຍາໂຄບ. ແລະເຂົາມີລູກສາວດ້ວຍ. ເຈົ້າຮູ້ຈັກຊື່ລູກຄົນໃດຄົນນຶ່ງບໍ? ໃຫ້ເຮົາຮຽນຮູ້ຈັກຊື່ບາງຄົນໃນພວກເຂົາ.
ເລອາໃຫ້ກຳເນີດລູເບນ ຊີເມໂອນ ເລວີແລະຢູດາ. ເມື່ອລາເຊນເຫັນວ່າຕົນບໍ່ມີລູກ ນາງຮູ້ສຶກເສົ້າເສຍໃຈ. ດັ່ງນັ້ນນາງໄດ້ຍົກບີລາທາສາວໃຊ້ຂອງນາງໃຫ້ຍາໂຄບ ແລະບີລາທາມີລູກສອງຄົນຊື່ດານແລະເນບທາລີ. ຕໍ່ມາເລອາໄດ້ຍົກຊີລາຟາສາວໃຊ້ຂອງຕົນໃຫ້ຍາໂຄບ ແລະຊີລາຟາໄດ້ໃຫ້ກຳເນີດຄາດແລະອາເຊນ. ໃນທີ່ສຸດເລອາໄດ້ລູກຊາຍຕື່ມອີກສອງຄົນ ອີຊາຄາແລະຊາບູໂລນ.
ໃນທີ່ສຸດລາເຊນສາມາດໄດ້ລູກຄົນນຶ່ງ. ນາງຕັ້ງຊື່ເຂົາວ່າໂຍເຊບ. ເຮົາຈະຮຽນຮູ້ຫຼາຍເລື່ອງອີກກ່ຽວກັບໂຍເຊບ ເພາະວ່າໂຍເຊບໄດ້ກາຍເປັນບຸກຄົນສຳຄັນຫຼາຍ. ລູກຊາຍ 11 ຄົນເຫຼົ່ານີ້ໄດ້ເກີດແກ່ຍາໂຄບເມື່ອເຂົາຢູ່ນຳລາບານພໍ່ຂອງລາເຊນ.
ຍາໂຄບມີລູກສາວບາງຄົນຄືກັນ ແຕ່ພະຄຳພີກ່າວເຖິງຊື່ຂອງຄົນດຽວເທົ່ານັ້ນ. ເຂົາຊື່ດີນາ.
ເວລາມາເຖິງເມື່ອ ຍາໂຄບຕັດສິນໃຈລາລາບານແລະເມືອແຜ່ນດິນການາອານ. ດັ່ງນັ້ນເຂົາໄດ້ລວບລວມຄອບຄົວໃຫຍ່ຂອງເຂົາແລະຝູງແກະແລະຝູງສັດລ້ຽງມາກຫຼາຍ ແລະເລີ່ມອອກເດີນທາງໄກ.
ຫຼັງຈາກຍາໂຄບແລະຄອບຄົວໄດ້ເມືອແຜ່ນດິນການາອານບໍ່ດົນປານໃດ ລາເຊນໄດ້ໃຫ້ກຳເນີດລູກຊາຍອີກຄົນນຶ່ງ. ການນີ້ເກີດຂຶ້ນຂະນະທີ່ເຂົາພວມເດີນທາງ. ລາເຊນຄອດລູກຍາກຫຼາຍ ແລະໃນທີ່ສຸດນາງກໍ່ຕາຍໃນລະຫວ່າງການຄອດ. ແຕ່ວ່າທາລົກຊາຍປອດໄພ. ຍາໂຄບໃຫ້ຊື່ທາລົກນັ້ນວ່າເບນຍາມີນ.
ພວກເຮົາຢາກຈື່ຊື່ລູກຊາຍ 12 ຄົນຂອງຍາໂຄບເພາະວ່າຊົນຊາດຍິດສະລາເອນທັງຊາດໄດ້ອອກມາຈາກພວກນີ້. ທີ່ຈິງແລ້ວ ຊົນຊາດຍິດສະລາເອນ 12 ກະກູນໄດ້ຊື່ຕາມລູກ 10 ຄົນຂອງຍາໂຄບແລະລູກຊາຍ 2 ຄົນຂອງໂຍເຊບ. ອີຊາກມີຊີວິດຢູ່ເປັນເວລາຫຼາຍປີຫຼັງຈາກເດັກນ້ອຍຜູ້ຊາຍເຫຼົ່ານີ້ເກີດມາ ແລະເຂົາຄົງມີຄວາມຍິນດີທີ່ມີຫຼານຫຼາຍໆຄົນດ້ວຍ. ແຕ່ໃຫ້ເຮົາເບິ່ງຕໍ່ໄປວ່າມີຫຍັງເກີດຂຶ້ນແກ່ດີນາຫຼານສາວຂອງເຂົາ.
ຕົ້ນເດິມ 29:32-35; 30:1-26; 35:16-19; 37:35.
