KEʼYINKA aju ja xjal lu. Aʼyetzun 12 tkyʼajal Jacobju. Ax ikx e ul itzʼji tmeʼl. ¿Ojtzqilaʼn tuʼne tiʼ kybʼi junjun tkʼwaʼl? Kʼelel qnikʼ kyiʼj junjun.

Aqetzun tal Lea jlu e ul itzʼj: Rubén, Simeón, Leví ex Judá. Tejtzun ttil, mo tlonte, Raquel mitiʼtaq nchi ul itzʼje tal, tzaj nim tbʼis tuʼn jlu. Tuʼntzunju, xi tqʼoʼn Raquel Bilhá aju tmajen te Jacob, ex ul itzʼji kabʼe tal Bilhá, Dan ex Neftalí kybʼi. Ax ikx te Lea xi tqʼoʼn Zilpá aju tmajen te Jacob, ex e ul itzʼje kabʼe tal Zilpá, Gad ex Aser kybʼi. Yajxitl e ul itzʼj kabʼetl tal Lea, a Isacar tukʼe Zabulón.

Pon jun qʼij jatumel ul itzʼj jun tal Raquel. José tbʼi ok tqʼoʼn. Yajxitl kʼelel mastl qnikʼ tiʼj José, quʼn ok te jun xjal nim toklen. Aʼyetzun 11 tkyʼajal Jacob qe jlu, aqejo e ul itzʼj tej nanqʼintoq tukʼe Labán aju tman Raquel.

Ax ikx e ul itzʼje junjun tmeʼl Jacob, oʼkx tbʼi jun ntzaj tqʼamaʼn Tyol Dios. Aju Dina tbʼi.

Pon ambʼil tuʼn tel bʼet Jacob tja Labán, tuʼntzun tajtz meltzʼaj Canaán. Tuʼntzujo, e kubʼ tchmoʼn qeʼ tuj tja kyukʼex qeʼ nim t-rit ex kyukʼex qeʼ nim twakiẍ, ex kubʼtzun toj bʼe.

Otaqxi bʼet ambʼil kyponlen Jacob kyukʼe toj tja Canaán, ul itzʼje juntl tal Raquel. Nche bʼetteq tej tikʼ jlu. Kwest ula itzʼji tal Raquel, tuʼntzunjo, bʼiʼx kyim tuʼn. Atzun te neʼ bʼaʼntoq taʼ. Benjamín tbʼi ok tqʼoʼn Jacob.

Qnantz kybʼi qeju 12 tkʼwal Jacob, quʼn atz ela tnam Israel kyiʼj jlu. A kybʼi qejo 12 kʼloj xjal te Israel atz ela tiʼj kybʼi qejo lajaj tkyʼajal Jacob ex tiʼj kybʼi qeju kabʼe tkʼwaʼl José. Nim abʼqʼitl anqʼin Isaac tej otaqxi chi ul itzʼje kykyaqil qejo qʼa lu, ex ojele tzalaj tuʼnjo ten nim tchman. Atzun jaʼle, qo xnaqʼtzal tiʼ bʼaj tiʼj Dina aju tal tchman Isaac.