Tanojnots 19

Jacob kinpiak miakej ichankauan

XIKITA, miakej ichankauan Jacob. Yejua nejin 12 iokichpipiluan. No kinpiak isiuapipiluan. ¿Tikmati imin tokay sekin ikoneuan Jacob? Maj tikitakan sekin.

Tein Lea kinpiak motokaytijkej Rubén, Simeón, Leví uan Judá. Keman Raquel kiitak ika amo uelia kinpiaya konemej, moteltayokoltij. Yejika kichiuak maj isiuatakeual tein motokaytij Bilhá, kinpiani konemej iuan Jacob, uan Bilhá kinpiak ome konemej tein motokaytijkej Dan uan Neftalí. Satepan, Lea no kichiuak maj isiuatakeual tein motokaytij Zilpá, kinpiani konemej iuan Jacob, uan Zilpá kinpiak konemej tein motokaytijkej Gad uan Aser. Ompa, Lea kinpiakok ome konemej tein motokaytijkej Isacar uan Zabulón.

Satepan Raquel no uelik kipiak se konet. Kitokaytij José. Satepan timomachtiskej toni kipanok uan toni kichiuak José, porin yej kichiuak uejueyi tachiualismej. Yejuan nejin 11 konemej tein kinpiak Jacob keman nemia iuan Labán, ipopaj Raquel.

Jacob no kinpiak isiuapipiluan, sayoj ika itech Biblia ixnesi sayoj se tein motokaytij Dina.

Ajsik tonal keman Jacob kinemilij kikauas Labán uan mokepas Canaán. Yejika kinisentilij ichankauan, ijkon kemej tel miakej iichkauan uan oksekin tapialmej, uan moojketskej.

Keman Jacob uan ichankauan moajsiajya seki tonalmej itech tal tein pouia Canaán, Raquel kipiak okse konet. Nejin mochiuak keman ojtokatoyajok. Amo kuali kikisak Raquel, uan ika momikilij keman kipiak ikoneuj. Sayoj ika konetsin kuali yetoya. Jacob kitokaytij Benjamín.

Tiknekij tikelnamikiskej imin tokay 12 ikoneuan Jacob, porin nochin israelitas ompa ualeujkej. Tein melauj, 12 kalyetouanij kampa ualeujkej israelitas, majtakti kipiaj imin tokay ikoneuan Jacob, uan ome kipiaj imin tokay ikoneuan José. Isaac nemikok miak xiujmej satepan keman nenkej nejin konemej, uan tel yolpakia kinpias miakej ixuimej. Sayoj ika, maj tikitakan toni kipanok iixuiuj Dina.

Génesis 29:32-35; 30:1-26; 35:16-19; 37:35.