TALA owala kuukwanegumbo mbuka owindji. Mbaka oyo aamati 12 yaJakob. Nokwa li wo e na aakadhona. Owa tseya omadhina gayamwe yomaanona? Natu ilonge po gamwe gomugo.

Lea okwa vala Ruben, Simeon, Levi naJuda. Sho Rakel a mono kutya ye ita mono nando aanona, ye okwa li a nika oluhodhi noonkondo. Ano okwa gandja omudhike gwe Bilha kuJakob, Bilha nokwa mono aamati yaali, oyo Dan naNaftali. Opo nduno Lea wo okwa gandja omudhike gwe Silpa kuJakob, Silpa nokwa vala Gad naAsser. Lwahugunina Lea okwa mono natango aamati yaali, Isaskar naSebulon.

Lwahugunina Rakel okwa mono okanona. Okwe ka luku Josef. Konima otatu ki ilonga oshindji noonkondo kombinga yaJosef, oshoka ye okwa ningi omuntu a simana noonkondo. Mbaka oyo aamati 11 ya valelwa Jakob omanga a li a kala puhe yaRakel, Laban.

Jakob naye wo okwa li e na aakadhona yalwe, ihe Ombimbeli otayi gandja owala edhina lyagumwe gwomuyo. Edhina lye oDina.

Ethimbo olya thikana kutya Jakob a tokole okuthiga po Laban nokushuna kuKanaan. Ano okwa gongele uukwanegumbo we owindji niigunda ye yoonzi nomausita ge goongombe, nokwa tameke olweendo olule.

Konima sho Jakob nuukwanegumbo we ya kala uule wokathimbo muKanaan, Rakel okwa mono natango okamati kamwe. Shika osha ningwa manga yo ya li molweendo. Rakel okwa li a mono uudhigu owindji, nolwahugunina okwa si manga a li ta mono. Ihe okahanona okamati oka li ke li nawa. Jakob okwe ka luku Benjamin.

Tse otwa hala okudhimbulukwa omadhina gaamati 12 yaJakob, oshoka oshigwana ashihe shaIsrael osha zi muyo. Omazimo 12 gaIsrael oga lukilwa oyanamati 10 yaJakob noyanamati yaali yaJosef. Konima yokuvalwa kwaamati ayehe mbano Isaak okwa kala natango e na omwenyo oomvula odhindji, nosha li shi na oku mu nyanyudha okukala e na aatekulu aamati oyendji ngaaka. Ihe natu tale kutya oshike sha ningilwa omutekulu omukadhona Dina.