TALA nkhele ombunga ei onene. Ava ovana va Jako 12 vovalume. Tupu ankho una ovana vovakai. Omanyina ovana va Jako ove wei? Matulilongesa kombinga ya vamue.

Leia watyita Rubem, na Simiau, na Levi na Judaa. Etyi Rakele amona okuti kekahi nokutyita, anumana unene. Moluotyo, waava ku Jako omuundapi wae omuhikuena utiwa o Bila. Iya Bila atyiti ovana vevali vatiwa o Dã na Nafetali. Tupu Leia aavela Jako omuundapi wae omuhikuena utiwa o Zilpa. Zilpa atyiti Gade na Aser. Iya Leia atyiti vali ovana vevali, Isakar na Zebulau.

Konyima Rakele nae watyita omona, ankho utiwa o Jose. Komutwe matukelilongesa unene kombinga ya Jose. Mokonda ankho omunthu umue wakolela unene. Ava, ankho ovana 11 va Jako, vatyitwa puetyi ankho akala na Labau tate ya Rakele.

Tupu Jako ankho wali novana vamue ovakai. Anthi Ombimbiliya itupopila vala enyima lia wike, ankho utiwa o Dina.

Onthiki imue Jako watokola okusapo Labau, opo akondoke ko Kanaa. Moluotyo, waongiya ombunga yae, noviunda viae ovinene vionongi, novipako ovikuavo, ahimbika oungendi wae.

Puetyi Jako nombunga yae ankho vakondoka ko Kanaa, Rakele atyiti vali omona omukuavo. Otyo tyapita puetyi nkhele vekahi moungendi. Pokukutula tyemuenda omapita, iya Rakele ankhi. Anthi, omona ankho una omuenyo. Jako emuluku enyina Benjamim.

Tuesukisa okuhinangela omanyina ovana va Jako 12 vovalume. Mokonda elongo aliho lio Isilayeli liatuka movana ovo. Omihoko 12 vio Isilayeli ankho vialukwa omanyina ovana 10 va Jako, novana vevali va Jose. Isake wakaleleko omanima omanyingi, konyima yokutyitwa kuovana ovo aveho. Ahambukwa unene mokuakala novatekula ovanyingi. Mahi, tutalei etyi tyapita nomutekula wae Dina.