Ekitebyo 19

Yakobo Aine Eka Mpango

REEBA eka egie empango. Aba ni batabani ba Yakobo 12. Kandi akaba aine n’abaishiki. Noomanya eiziina ry’omwe aha baana abo? Ka twegye gamwe aha maziina ago.

Lea akazaara Reubeeni, Simeoni, Leevi na Yuda. Rakeeli ku yaareebire ngu taine mwana n’omwe, yaashaasha munonga. N’ahabw’ekyo yaaheereza Yakobo omuzaana we Biliha, atyo Biliha yaamuzaarira aboojo babiri abarikwetwa Daani na Nafutaali. Bwanyima Lea nawe yaaheereza Yakobo omuzaana we Zilupa kandi Zilupa yaazaara Gaadi na Asheri. Lea aha muheru yaazaara abandi boojo babiri Isakaari na Zebuluuni.

Aha muheru Rakeeli nawe yaazaara omwana. Yaamweta Yosefu. Bwanyima nitwija kwega bingi ebirikukwata ahari Yosefu, ahabw’okuba akaba omuntu mukuru munonga. Aba nibo baana 11 abu Yakobo yaazaire obu yaabaire naatuura n’ishe wa Rakeeli Labaani.

Yakobo akaba aine abahara, kwonka Baibuli netugambira iziina ry’omwe ahari abo. Eiziina rye akaba ari Dina.

Obunaku bukahika obu Yakobo yaacwamu okutsigaho Labaani akagaruka Kanaani. N’ahabw’ekyo akarundaana hamwe eka ye empango n’amasyo ge g’entaama n’ente, atyo yaatandika orugyendo ruraingwa.

Bwanyima y’omwanya mukye, Yakobo n’eka ye baherize kugaruka Kanaani, Rakeeli akazaara omwana w’omwojo ondiijo. Akamuzaara bari omu rugyendo. Rakeeli akagira oburemeezi bwingi bwanyima yaafa naazaara. Kwonka omwana we akaguma ahuriire. Yakobo akamweta Benyamiini.

Nitwenda kwijuka amaziina ga batabani ba Yakobo 12 ahabw’okuba eihanga ryona erya Israeli rikaruga omuri bo. Nangwa n’enganda 12 eza Israeli zikeetererwa abatabani ba Yakobo 10 hamwe n’abatabani ba Yosefu babiri. Isaaka akahangaara emyaka mingi bwanyima y’okuzaarwa kw’aba boojo, kandi aine kuba yaashemereirwe munonga okugira abaijukuru baingi munonga. Kwonka ka twetegyereze ekyahikire aha mwijukuru Dina.

Okutandika 29:32-35; 30:1-26; 35:16-19; 37:35.