LUKIM disfala bigfala famili. Olketa hia 12-fala son bilong Jacob. And hem garem samfala dota tu. Waswe, iu savve long nem bilong eni pikinini hia? Bae iumi lanem nem bilong samfala.

Leʹah hem bornem Reuʹben, Simʹe·on, Leʹvi and Judah. Taem Rachel lukim hem no garem eni pikinini, hem feel sorre tumas. So hem givim gele servant bilong hem Bilʹhah long Jacob, and Bilʹhah garem tufala son wea nem bilong tufala Dan and Naphʹta·li. Then Leʹah givim gele servant bilong hem Zilʹpah tu long Jacob, and Zilʹpah bornem Gad and Ashʹer. Gogo, Leʹah bornem tufala son moa, Isʹsa·char and Zebʹu·lun.

Then Rachel garem wanfala pikinini. Nem bilong hem Joseph. Bihaen, iumi bae lanem plande samting abaotem Joseph, bikos hem kamap wanfala barava important man. Olketa hia nao 11-fala son wea born from Jacob taem hem stap witim dadi bilong Rachel, Laʹban.

Jacob garem samfala dota tu, bat Bible talem iumi nem bilong wanfala long olketa nomoa. Hem nao Diʹnah.

Gogo, Jacob hem disaed for lusim Laʹban and go bak long Caʹnaan. So hem hipimap bigfala famili bilong hem and staka sheep and buluka, and startim longfala wakabaot hia.

Bihaen Jacob and famili bilong hem kam bak long Caʹnaan, Rachel hem bornem narafala son. Diswan happen taem olketa long road. Rachel hem kasem hardfala taem, and gogo hem dae taem hem bornem pikinini hia. Bat disfala smol baby boy hem olraet. Jacob kolem hem Benjamin.

Iumi want for rememberim nem bilong 12-fala son bilong Jacob bikos full nation bilong Israel kamaot from olketa. Tru nao, 12-fala tribe bilong Israel olketa nem followim 10-fala son bilong Jacob and tufala son bilong Joseph. Isaac stap for plande year bihaen evri boy hia born, and hem hapi tumas for garem plande grani. Bat iumi bae lukim samting wea happen long grani bilong hem Diʹnah.