19 yachachiy

Jacobpa jatun ayllun

KAY aylluta qhawariy. Paykunaqa Jacobpa 12 churisnin kanku. Paypa ususisnin kallarqataq. ¿Churisninpata sutisninta yachankichu? Wakin sutita kunan yachakusunchik.

Leap wawasninqa Rubén, Simeón, Leví, Judá ima karqanku. Raquelqa mana wawayuq kayta atisqanrayku mayta llakikurqa. Chayrayku Bilha kamachinta Jacobman jaywarqa, Bilhap churisnintaq Dan, Neftalí ima, karqanku. Chanta Lea Zilpa kamachinta Jacobman jaywallarqataq, Zilpap churisnintaq, Gad, Aser ima, karqanku. Aswan qhipanman Leaqa, 2 churiyuq kallarqataq, paykunaqa Isacar, Zabulón, ima karqanku.

Chaymantaraq Raquelqa juk wawitata nacechikurqa, payqa José sutichakurqa. Qhipaman Josemanta astawan yachakusunchik, imaynatachus kamachiq runaman tukusqantapis. Kaykuna Jacobpa 11 churisnin karqanku, Labanpa wasinpi kachkaptin.

Jacobqa ususisniyuq kallarqataq, Bibliaqa Dina ususillanmanta sutinta willawanchik.

Jacobqa Canaanman kutinanpaq, Labanta saqinan karqa. Chayrayku ayllunta uywasnintapis tantaspa Canaán llaqtaman ripurqa.

Jacob familianwan Canaanman chayarqanku. Chaymanta maymanchá richkaspa Raquel juk wawitata nacechikullarqataq. Wawitanta nacechikuchkaspa wañupurqa, wawitanqa sanitulla paqarikurqa. Jacob chay wawitanta Benjamín nispa suticharqa.

Jacobpata 12 churisninpa sutinkuta yuyarinanchik tiyan, paykunamanta Israel llaqta jamusqanrayku. Israelpa 12 ayllunqa, Jacobpa 10 churisninmanta urqhukun, 2 ayllutaq Josep churisninmanta urqhukun. Isaacqa achkha allchhisninta wiñaqta rikuspa maytacha kusikurqa. Qhipanman Dina allchhinmanta astawan yachasunchik.

Génesis 29:32-35; 30:1-26; 35:16-19; 37:35.