CHAWILAMPEʼ ri e kʼi täq ralkʼwal ri Jacob. E are waʼ ri kabʼlajuj (doce) ukʼojol. Xuqujeʼ xekʼejeʼ nikʼaj umiʼal. ¿La awetaʼm kibʼiʼ jujun chike täq ralkʼwal? Chqilampeʼ su kibʼiʼ nikʼaj chike.

Rubén, Simeón, Leví xuqujeʼ Judá e ral ri ixoq ubʼiʼ Lea. Chiʼ ri Raquel xrilo che kkun täj kkʼejeʼ ral, xpe jun nimalaj bʼis pa ranimaʼ. Rumal laʼ ri Raquel xuya jun umos ubʼiʼ Bilhá che ri Jacob rech kkʼejeʼ ralkʼwal rukʼ, tekʼuriʼ ri Bilhá xkʼejeʼ kebʼ ral, jun ubʼiʼ Dan jun chik ubʼiʼ Neftalí. Xuqujeʼ ri Lea xuya jun umos che ri Jacob ubʼiʼ Zilpá, tekʼuriʼ ri Zilpá xkʼejeʼ kebʼ ral jun ubʼiʼ Gad jun chik ubʼiʼ Aser. Kʼisbʼal re Lea xkʼejeʼ chi kebʼ ral, jun ubʼiʼ Isacar jun chik ubʼiʼ Zabulón.

Kʼisbʼal re ri Raquel xkunik xkʼejeʼ jun ral. José xukoj che ubʼiʼ. Pa nikʼaj chik täq bʼantajik kqil na ri ukʼaslemal ri José, rumal che areʼ xubʼan nim uqʼij che kiwäch ri winaq. E are waʼ ri julajuj (11) ukʼojol ri Jacob xekʼejeʼik chiʼ kʼo pa rachoch Labán, utat Raquel.

Ri Jacob xuqujeʼ xekʼejeʼ nikʼaj umiʼal, ri Loqʼalaj Pixabʼ xiw kubʼij jun ubʼiʼ chike ri umiʼal. Wajun ali ubʼiʼ Dina.

Xopan ri qʼij che ri Jacob xel bʼi cho rachoch Labán tekʼuriʼ xtzalaj pa ri utinamit Canaán. Rumal laʼ xeʼumol ronojel ri jupuq täq uchij xuqujeʼ ri kʼi täq chiköp, tekʼuriʼ rukʼ ronojel ufamilia xebʼek.

Qʼaxnäq che ri qʼij che ri Jacob xuqujeʼ ri ufamilia xebʼe Canaán, xkʼejeʼ chi jun ral ri Raquel. Wariʼ xbʼantajik chi e kʼo pa bʼe. Sibʼalaj xuriq kʼäx chiʼ tijan kkʼejeʼ ral rumal laʼ xkamik. Ri alaj neʼ utz uwäch. Ri Jacob xukoj Benjamín che ubʼiʼ.

Are utz we ksach ta pa qajolom ri kibʼiʼ ri 12 ukʼojol ri Jacob rumal che are wa achijabʼ riʼ xkebʼan ronojel ri tinamit Israel. Xuqujeʼ ri kibʼiʼ ri 12 tribus rech Israel xel chike ri kibʼiʼ ri 10 ukʼojol ri Jacob xuqujeʼ rech kebʼ chike ri ukʼojol ri José. Isaac xkʼaseʼ na kʼi täq junabʼ chiʼ e kʼo chi ri täq ralkʼwal ri Jacob, ri Isaac sibʼalaj xkikotik rumal ri täq ukʼojol ri Jacob. Chqilabʼaʼ su xuriq ri Dina.