TENNE halaˈlado maate lai. Kuri 12 Yaaqoobi oosooti. Qoleno, isi seenneno ilino. Oososi giddo suˈmasi afoottohu no? Oososi giddo hanni gamu ayeeootiro ronso.

Liya Roobeeli, Simiooni, Leewinna Yihuda iltu. Raaheeli mitto qaaqqo nafa ila hoogasenni lowo geeshsha xissiisidhu. Konni daafira, soqqamaanchose Baalla Yaaqoobira galte assite uyitu; Baalla Daaninna Niftaaleemi yinannire lame labballo ooso iltu. Hakkunni gedensaanni, Liyano soqqamaanchose Zelefa Yaaqoobira galte assite uyiteenna, Zelefa Gaadinna Aseeri iltu. Gedensaanni, Liya Yisaakoorinna Zaabilooni ledde iltu.

Yannate gedensaanni Raaheeli qaaqqo iltu. Suˈmasino Yooseefi yitu. Albaange Yooseefi lainohunni lowori ronseemmori no; korkaatuno isi lophphe macca mancho ikkino. Yaaqoobi kore 11 ooso ilinohu Raaheeli anniwa Laabawa heeˈreeti.

Yaaqoobi seenneno ilino; kayinni Qullaawu Maxaafi mittete suˈmalla kulanno. Suˈmise Diinaati.

Yaaqoobi Laaba qaenni fule Kanaˈˈaani higanno yanna iillitu. Konni daafira halaˈlado maatesinna hoshsha gereewosi hattono saadasi woˈmanta gamba assire Kanaˈˈaani higi.

Yaaqoobinna maatesi Kanaˈˈaani gobbara shiima yanna heedhu gedensaanni, Raaheeli wole qaaqqo iltu. Iltinohu doogo hadhanni heedheeti. Raaheeli iltanni lowo geeshsha qarrantu; ilate aanano reyitu. Ikkollana ilamino qaaqqi mittore diˈˈikkino. Yaaqoobi qaaqqoho suˈma Biiniyaami yee fushshi.

Yaaqoobire 12 labballo ooso suˈma hawa hooganke hasiissannote; korkaatuno woˈma Isiraeelete daga insa giddonni fultinoreeti. Tonaalame Isiraeelete gaˈrera suˈma fushshinoonnihu Yaaqoobiri 10 oosonna Yooseefiti lame ooso ilantu gedensaanniiti. Tini ooso woˈmanti ilantu gedensaanni, Yisaaqi lowo diro heeˈrino; lowo oosora ahaaho ikkasinni hagiidhikki digatino. Yisaaqi ahaaho ikkannotera Diinara mayi iillinosero hanni laˈno.