Tantara 19

Nana Fianakaviam-be Jakoba

SOMARY henteo moa fianakavia maro anake toy. Ty anake lahin’i Jakoba 12 reo. Nana anak’ampela kea ie. Mba misy hainao va anaran’ajà reo? Ndao hianarantsika ty sasane ami’zay.

Lea ro niterake an’i Robena, Simeona, Levy noho Joda. Nalahelo biby Rahely laha fa tsy nanan’anake. Zay ty antone nanomezane an’i Bila mpanompovavine ho valin’i Jakoba, ka niterake anake lahy roe tamin’i Jakoba Bila, Dana noho Naftaly. Bakeo namean’i Lea an’i Jakoba kea ty mpanompovavine raike atao hoe Zilpa zay, ka niterake ajà roe kea Zilpa, Gada noho Asera. Farane le nanan’anake lahy roe hafa ndraike Lea, Isakara noho Zebolona.

Tamy farane le niterake raike koa Rahely, Josefa ty anara nameane aze. Afarafara ao, le hianatse raha maro mikasike an’i Josefa tsika, satria nanjary olo nalaza ie. Roze 11 reo ty anake lahy nateran’i Jakoba laha fa niarake nipetrake tamin’i Labana baban’i Rahely ie.

Nana anak’ampela vitsivitsy kea Jakoba, fe raike avao ty anara’ty anak’ampelane hita amy Baiboly ao. Dina ty anarane.

Avy henany zao ty fotoa hialàn’i Jakoba amin’i Labana rafozane ao. Navorine iaby ty fianakaviam-beny, ty aondry, aosy noho aomby maro biby, ka niala teo ie, handeha himpòly a-Kanana any.

Laha fa niavy kelikele ta-Kanana tao Jakoba noho ty fianakaviam-beny, le niterake anake lahy faharoe Rahely. Tam-pandehana teny ro niseho raha reo. Nisarotim-piteràha Rahely tamy fotoa zay, ka le nimaty tam-piteràha teo. Fe tsy nanino ajà iny. Benjamina ro anara namean’i Jakoba aze.

Teantsika ty hahatiaro anara anake lahin’i Jakoba 12 reo, satria niboake baka amin-droze reo ty firenen’Israely manontolo. Laha ty marina, ty foko 12 amin’Israely le namea anara baka amy anara anake lahin’i Jakoba folo reo noho ty anan’i Josefa roe lahy. Mbo nivelo Isaka, tao maro tafara’ty nahaterahan’ajà iaby reo, ka azo antoke fa nahasambatse aze ty nahita zafine maro biby reo. Fe ndao ho henteantsika ty raha niseho tamy zafine raike atao hoe Dina iny.

Genesisy 29:32-35; 30:1-26; 35:16-19; 37:35.