ATAÑÚN bi̱ kuwa náa mbá guʼwá bi̱ kuwa mbaʼin. Bugi̱ ni̱ndxu̱ún 12 e̱ji̱i̱n Jacob. Ma̱ngaa ikhaa nigiʼdiin waʼxaʼ. Lá natayáá káʼnii mbiʼñún tikhun e̱ji̱i̱n jiama xáʼ. Majmañulúʼ tikhuu.

Lea nigiʼdaa Rubén, Simeón, Leví ga̱jma̱a̱ Judá. Índo̱ Raquel ndiʼyoo rí na̱nguá egiʼdiin e̱ji̱n, nixtáa gíná wéñuʼ. Ikha jngó Raquel nixniúu Jacob bi̱ nambáyuu bi̱ mbiʼyuu Bilha, ma̱ngaa Bilha nigiʼdiin a̱jmi̱i̱n e̱ji̱i̱n bi̱ nimbiʼñún Dan ga̱jma̱a̱ Neftalí. Ikhú ma̱ngaa Lea nixniúu Jacob bi̱ nambáyuu bi̱ mbiʼyuu Zilpa, ma̱ngaa Zilpa nixtáa a̱ʼdióo Gad ga̱jma̱a̱ Aser. Nda̱wa̱á kayuʼ Lea nigiʼdiin a̱jmi̱i̱n e̱ji̱i̱n jiama, Isacar ga̱jma̱a̱ Zabulón.

Nda̱wa̱á Raquel nindoo nigiʼdaa mbáa a̱ʼdióo. Nixná mbiʼyuu José. Nda̱wa̱á gájmañuluʼ xóó itháan ga̱jma̱a̱ numuu José, numuu rí ikhaa ni̱jkha̱nú ninindxu̱u̱ mbáa xa̱bu̱ bi̱ nigiʼdoo wéñuʼ numuu. Bugi̱ ninindxu̱ún 11 e̱ji̱i̱n Jacob bi̱ nigumiin índo̱ rí nixtáa ga̱jma̱a̱ Labán anu̱u̱ Raquel.

Jacob ma̱ngaa nigiʼdiin tikhun waʼxaʼ, mú náa Biblia naxná mbiʼyuu mbáwíi dí ikhaa. Nigumbiʼyuu Dina.

Ni̱jkha̱nú mbiʼi rí Jacob niʼthí maniñuʼ Labán mu mata̱nga̱a̱ náa Canaán. Ikha jngó nigímbíin xúgínʼ bi̱ kuwa náa goʼwóo ga̱jma̱a̱ mugiu̱u̱ bi̱ mbaʼin wéñuʼ ga̱jma̱a̱ xediu̱u̱ bi̱ mbaʼin, ikhú nigájnuu ni̱jkha̱ mitsinguánʼ.

Nda̱wa̱á rí nitanga̱a̱ Jacob gajmíi̱n bi̱ kuwa náa goʼwóo náa Canaán, nixtáa imba̱a̱ a̱ʼdióo Raquel. Rígi̱ nigíʼnuu índo̱ rí kúwi̱i̱n ragun kamba̱a̱. Raʼkhí rí nigíʼnuu Raquel, ikhú nikháñu índo̱ rí xtáa raʼnii a̱ʼdióo. Mú ada̱ xtáa má májánʼ. Jacob nixná mbiʼyuu Benjamín.

Nanduluʼ marmáʼáan a̱jkiu̱lúʼ xú káʼnii nimbiʼñún bi̱ 12 e̱ji̱i̱n Jacob numuu rí xúgíʼ xuajin Israel ni̱ʼkha̱ náa ikhiin. Mbá 12 xuajin ma̱jkha̱ʼ ndrígóo Israel gíʼdoo nambiʼñún mbá gu̱wi̱nʼ e̱ji̱i̱n Jacob ga̱jma̱a̱ a̱jmi̱i̱n e̱ji̱i̱n José. Isaac xóó nixtáa mba̱yu̱u̱ʼ tsiguʼ nda̱wa̱á índo̱ nigumiin xúgínʼ jiama bugi̱, mbáa asndu nixtáa gagi rí nigiʼdiin mbaʼin e̱jín xíñiiʼ. Mú guʼyáá káʼnii nigíʼnuu aʼdá xíñiiʼ Dina.