STORI 19
Jekop i Gat Bikpela Famili
LUKIM dispela bikpela famili. Em ol 12-pela pikinini man bilong Jekop. Na em i gat ol pikinini meri tu. Yu save long nem bilong sampela? Orait nau yumi ken kisim save long sampela bilong ol.
Lea i karim Ruben, Simeon, Livai, na Juda. Taim Resel i lukim olsem em i no karim pikinini, em i bel hevi. Olsem na em i givim wokmeri bilong em Bilha long Jekop, na Bilha i karim tupela pikinini man, em Dan na Naptali. Orait, Lea tu i givim wokmeri bilong em Silpa long Jekop, na Silpa i karim Gat na Aser. Bihain Lea i karim tupela pikinini man moa, em Isakar na Sebulun.
Bihain tru Resel i karim wanpela pikinini, em Josep. Bihain bai yumi kisim sampela save moa long Josep, long wanem, em i kamap man i gat bikpela namba. Jekop i kamapim ol dispela 11-pela pikinini man taim em i stap wantaim papa bilong Resel, em Laban.
Jekop i kamapim sampela pikinini meri tu, tasol Baibel i kolim nem bilong wanpela tasol, em Daina.
Bihain Jekop i tingting long lusim Laban na go bek long Kenan. Olsem na em i bungim bikpela famili bilong em, na bikpela lain sipsip na bulmakau, na em i go bek long Kenan.
Taim Jekop na famili bilong em i kamap pinis long Kenan na ol i stap longtaim liklik, Resel i karim narapela pikinini man. Em i karim dispela pikinini taim ol i wokabaut i go long wanpela hap. Resel i hatwok long karim pikinini, na em i dai. Tasol liklik bebi i stap orait. Jekop i kolim nem bilong em Benjamin.
Yumi mas tingim nem bilong ol 12-pela pikinini man bilong Jekop, long wanem, ol i tumbuna bilong lain Israel. Ol 12-pela lain bilong Israel i kisim nem long 10-pela pikinini man bilong Jekop na tupela pikinini man bilong Josep. Aisak i stap longpela taim, na em i amamas long em i gat planti tumbuna pikinini. Tasol nau yumi ken stori long samting i bin kamap long wanpela tumbuna pikinini bilong em, em Daina.