ILAWIL te kʼax bayal te machʼatik tsobolik liʼ ini. Jaʼik te lajchayeb ta jtul snichʼnab te Jacobe. Jaʼnix jich ay la sta yantsil nichʼnab. ¿Yabal anaʼtiklambey sbiil chaʼoxtul te snichʼnab te Jacobe? Ya jnoptik bael junchebuk te sbiilike.

Te Lea la yayintes te Rubén, Simeón, Leví sok Judá. Te kʼalal la yil te Raquel te maba ya sta yal stukele, bayal la smel yoʼtan yuʼun. Jich yuʼun te Raquel la yakʼbey te Jacob te yabat te Bilha (Bilhá) sbiile. Jich te Bilha la sta cheb skerem al te Dan sok te Neftalí sbiilike. Jaʼnix jich te Lea la yakʼbey euk te Jacob te Zilpa (Zilpá) te yabate. Jich te Zilpa la sta skerem al te Gad sok te Aser. Ta patil te Lea la staxan cheb skerem al te Isacar sok te Zabulón.

Ta patil juʼ yuʼun stael jtul yal te Raquele. Te la yakʼbey sbiilin José. Ya jnoptik bael ta patil ta swenta te José, melel mukʼ skʼoplal kʼot stukel. Jaʼik te bulucheb ta jtul snichʼnab te Jacob te ayinik te kʼalal sjokinejto ta kuxinel-a te Labán te stat te Raquele.

Jaʼnix jich ay la sta chaʼoxtul yantsil nichʼnab te Jacobe, jaʼukmeto jtulnax te machʼa ya yalbey sbiil te Bibliae. Jaʼ te Dinae.

La sta yorail te Jacob la snop te ya yijkʼitay jilel te Labán yuʼun ya sujt bael ta Canaán. Jich yuʼun la stsob spisil te machʼatik jayeb ay yuʼune sok te bayal ta jtsojb tuminchijetik yuʼun soknix te wakaxetik yuʼune, jich jajchik bael ta beel ta namal.

Te kʼalal ay kʼaxemix bayal kʼajkʼal-a te yak ta sujtel bael Jacob ta Canaán sok te jayeb machʼatik ay yuʼune, te Raquel la yayintes yan skerem al. Jaʼ ini kʼot ta pasel te kʼalal yakalik ta beel-ae. La sta swokol te Raquel, sok laj te kʼalal yak ta yayintesel-a te yale. Jaʼukmeto lek ay stukel te unin alale. Te Jacob la yakʼbey sbiilin Benjamín.

Ya skʼan te yakuk xjul ta koʼtantik te sbiilik te lajchayeb ta jtul te snichʼnab te Jacobe, melel tey chiknaj tal-a te nación yuʼun Israele. Te slajchayebal ta chajp stsʼumbal Israel lajuneb jaʼ yichʼojbey sbiil te snichʼnab te Jacobe, te chebxane jaʼ yichʼojbey sbiil te snichʼnab te Josee. Kuxintoxan bayal jaʼbil te Isaac te kʼalal ayinemikix ta spisilik-a te keremetik ini, bayalniwan la smulan te bayal la sta smamtake. Jaʼukmeto ya kiltik bael te bin kʼot ta stojol te smam te Isaac te Dina sbiile.