Nganea 19: Yakobo u Na Muṱa Muhulu
Edzanu vhona uyu muṱa muhulu. Avha ndi vharwa vha Yakobo vha 12. Nahone o vha e na vhananyana. Madzina a vhaṅwe vha vhana ni a a ḓivha? Kha ri gude maṅwe ao.
Lea o beba Rubeni, Simeoni, Levi na Yuda. Musi Rahele a tshi vhona uri ha vhi na vhana, a fha Yakobo mushumeli wawe Biliha, nahone Biliha a vha na vharwa vhavhili vhane vha pfi Dani na Nafutali. Zwenezwo Lea na ene a fha Yakobo mushumeli wawe Silipa, nahone Silipa a beba Gada na Asere. Mafheleloni Lea a dovha a vha na vharwa vhavhili, Isashari na Sebuloni.
Mafheleloni Rahele a kona u vha na ṅwana. A mu rina ḽa Yosefa. Ri ḓo guda zwinzhi nga ha Yosefa nga murahu, ngauri o vha muthu muhulwane. Havha vho vha vhe vharwa vha 11 vhe vha bebelwa Yakobo musi a tshi dzula na Labani khotsi a Rahele.
Yakobo o vha a na vhananyana, fhedzi Bivhili i ṋea dzina ḽa muthihi fhedzi wavho. Dzina ḽawe ḽo vha ḽi Dina.
Ha ḓa tshifhinga tsha musi Yakobo a tshi humbula u sia Labani a vhuelela Kanana. Ngauralo a kuvhanganya muṱa wawe muhulu na miṱambi yawe ya nngu na ya. kholomo, a thoma lwendo.
Yakobo na muṱa wawe vho no vha Kanana tshifhinganyana, Rahele a beba muṅwe murwa. Zwo itea musi vhe lwendoni. Rahele a vha na tshifhinga tshi konḓaho, a fa a tshi khou beba. Fhedzi ṅwana wa mutukana a tshila. Yakobo a mu rina ḽa Benyamini.
Ri ṱoḓa u humbula madzina a vharwa vha Yakobo vha 12 ngauri lushaka lwoṱhe lwa Isiraele lwo bva khavho. Ee, tshaka dza 12 dza Isiraele dzo rinwa nga madzina a vharwa vha 10 vha Yakobo na vharwa vhavhili vha Yosefa. Isaka o tshila miṅwaha minzhi vhatukana vho no bebwa, nahone zwo fanela a vha zwo mu takadza u vha na vhaḓuhulu vhanzhi. Fhedzi kha ri vhone zwe zwa itea kha Dina muḓuhulu wawe.
Genesi 29:32-35; 30:1-26; 35:16-19; 37:35.
Mbudziso
- Vharwa vha rathi vha Yakobo vhe a bebelwa vhone nga Lea musadzi wawe wa u thoma ndi vhonnyi?
- Vharwa vhavhili vha Yakobo vhe a bebelwa vhone nga mulanda wa musidzana wa Lea ane a pfi Silipa ndi vhonnyi?
- Vharwa vhavhili vha Yakobo vhe a bebelwa vhone nga mulanda wa musidzana wa Rahele ane a pfi Biliha ndi vhonnyi?
- Vharwa vha Rahele vhavhili ndi vhonnyi, fhedzi ho itea mini musi hu tshi bebwa murwa wa vhuvhili?
- U ya nga itshi tshifanyiso, Yakobo o vha e na vharwa vhangana, nahone ho bva mini khavho?
Mbudziso dzo engedzeaho
- Vhalani Genesi 29:32-35 na 30:1-26.
Samusi zwo sumbedzwa kha mafhungo a vharwa vha 12 vha Yakobo, kanzhi vhatukana vha Vhaheberu zwifhingani zwa kale vho vha vha tshi vhidzwa nga dzina ḽifhio?
- Vhalani Genesi 35:16-19 na 37:35.
Naho ho ambiwa nga Dina fhedzi Bivhilini, ri zwi ḓivha hani uri Yakobo o vha e na vhaṅwe vhana vha vhasidzana? (Gen. 37:34, 35)
