AGAMBE kulola liŵasa lyekulungwali. Ŵeleŵa ali ŵanace ŵacilume 12 ŵa Yakobo. Jwalakwe ŵakwetesoni ŵanace ŵacikongwe. Ana akumanyilila mena ga ŵane mwa ŵanace ŵakwe? Kwende tutagulilane gane mwa menaga.

Leya ŵaŵelece Lubeni, Simiyoni, Lefi ni Yuda. Lakelo paŵayiweni kuti ngakukola mwanace, ŵaliji jwakudandawula mnope. M’yoyo ŵampelece kapolo jwakwe Biliha kwa Yakobo, ni Biliha ŵaŵelece ŵanace ŵaŵili ŵakolanjikwa Dani ni Nafutali. Kaneko Leya nombenajo ŵampelece kapolo jwakwe Silipa kwa Yakobo, ni Silipa ŵaŵelece Gadi ni Asha. Leya kaneko ŵaŵelecesoni ŵanace ŵaŵili, Isakala ni Sebuloni.

Kumbesi kwakwe Lakelo nombenajo ŵakombolece kola mwanace. Jwalakwe ŵamkolasile kuti Yusufu. Ndaŵi jine citulijiganye yejinji yakwamba Yusufu, ligongo jwalakwe kumbesi kwakwe ŵaliji mundu jwakusosekwa mnope. Ŵeleŵa ŵaliji ŵanace 11 ŵacilume ŵa Yakobo ŵaŵapagwile Yakobo ali mkutama yimpepe ni ce Labani, babagwe Lakelo.

Yakobo ŵakwetesoni ŵanace ŵacikongwe, nambo Baibulo jikusagamba kutusalila lina lya mwanace jumope. Lina lyakwe lyaliji Dina.

Ndaŵi jakwanile jakuti Yakobo ŵaganisisye yakulekangana ni ce Labani nikuwujila ku Kanani. Sambano ŵasongangenye pampepe liŵasa lyakwe lyekulungwalyo, yilango yakwe yejinji yayaliji ngondolo ni ng’ombe, ni ŵanyakwice ni kwenda ulendo wawulewu.

Yakobo ni liŵasa lyakwe paŵayice ku Kanani, Lakelo ŵaŵelecesoni mwanace jwine jwamlume. Yeleyi yatendekwe paŵaliji paulendo wine m’cilambomo. Lakelo ŵalasile mnope paulendowu kaneko ŵawile ali mkuŵeleka mwanace. Nambo kamwanace kakalume kakapagwileko kalamile. Yakobo ŵakapele lina lyakuti Benjamini.

Tukusosekwa kukumbucilaga mena ga ŵanace ŵacilume 12 ŵa Yakobo, ligongo mtundu wosope wa Ayisalayeli watyocele mwa jemanjaji. Mitundu 12 ja Ayisalayeli jikusakolanjikwa mwakamulana ni ŵanace ŵacalume 10 ŵa Yakobo, soni ŵanace ŵacalume ŵaŵili ŵa Yusufu. Ŵanace wosopeŵa ali apagwile, Isaki ŵatemi ni umi kwa yaka yejinji, soni komboleka kuti ŵasangalele kola yisukulu yejinji mnope. Nambo kwende tulole yayatendecele cisukulu cakwe cine cakolanjikwa kuti Dina.