ANƐ o na nihi nɛ Dina yaa slaa mɛ ɔ lo? E yaa slaa Kanaan yiwi komɛ. Anɛ e tsɛ Yakob bua maa jɔ enɛ ɔ he lo? Bɔnɛ pee nɛ waa na heto ɔ, mo kai bɔnɛ Abraham kɛ Isak susuɔ ngɛ Kanaan yi ɔmɛ a he ha.

Anɛ Abraham suɔ kaa e bi Isak nɛ́ ngɔ Kanaan yo lo? Dɛbi, e sume. Nɛ anɛ Isak kɛ Rebeka hu suɔ kaa a bi Yakob nɛ́ ngɔ Kanaan yo lo? Dɛbi, a sume. O le nɔ́ heje lo?

Ejakaa Kanaanbi ji wɔ jali. A pi nimli nɛ́ sa kaa a kɛ mɛ sɛɛ gba si himi mi, nɛ a pi nimli hu nɛ́ sa kaa a kɛ mɛ bɔɔ huɛ. Enɛ ɔ maa nɔ mi kaa Yakob bua jɔɛ e biyo ɔ kɛ Kanaan yiwi ɔmɛ a huɛ bɔmi ɔ he.

Nɛ niinɛ hu ɔ, Dina ya sɛ haomi mi. O na Kanaan nyumu ɔ nɛ́ ngɛ Dina hyɛe ngɛ foni ɔ mi ɔ lo? E biɛ ji Shekem. Ligbi ko benɛ Dina ya slaa e huɛmɛ ɔmɛ ɔ, Shekem nu lɛ pani nya nɛ e kɛ lɛ hwɔ si. Enɛ ɔ ji tɔmi, ejakaa nyumu kɛ yo nɛ sɛ gba si himi mi pɛ nɛ a ngɛ he blɔ kaa a hwɔɔ si. Nɔ́ yayami nɛ́ Shekem pee Dina nɛ ɔ ngɔ haomi kpahi fuu kɛ ba.

Benɛ Dina nyɛminyumu ɔmɛ nu sane ɔ he ɔ, a mi mi fu wawɛɛ. A kpɛti nihi enyɔ, nɛ ji Simeon kɛ Levi a mi mi fumi ɔ ha nɛ́ a ngɔ klaatehi kɛ ya tua nyumu ɔmɛ ngɛ ma a mi. Simeon kɛ Levi, kɛ a nyɛmimɛ ɔmɛ gbe Shekem kɛ nyumuhi kpahi tsuo. Yakob mi mi fu ngɛ nɔ́ yayami nɛ ɔ nɛ e binyumu ɔmɛ pee ɔ he.

Kɛ haomihi nɛ ɔmɛ tsuo plɛ kɛ je sisi kɛɛ? Nihi nɛ́ yi Mawu mlaa nɔ nɛ́ Dina kɛ mɛ ya bɔ huɛ ɔ heje. Wa be suɔe kaa waa kɛ nihi kaa kikɛ maa bɔ huɛ. Aloo wa maa pee ja?