ÖHNE fe hi nyipunieti cahu itre jajiny hnei Dina hna troa wang? Itre jajinyi ne Kanana angatr. Hnei Iakobo kö keme i angeic hna kapa la aqane tro cili? Atre hi së lo hna mekune hnei Aberahama me Isaaka, göne la itre föe ne Kanana.

Aja i Aberahama kö tro Isaaka nekö i nyidrë, a ixom memine la ketre föe ne Kanana? Ohe. Tune kaa Isaaka me Rebeka, aja i nyidroti kö tro Iakobo a nyi föi angeic, la ketre jajinyi ne Kanana? Ohe. Atre fe hi nyipunieti la kepin?

Ame angetre Kanana, angetre hmi kowe la itre haze. Celë hi matre, ame la itre trahmanyi me föe ne la nöje cili, thaa loi kö troa ixomi memin, me nyi sineen. Nyine tro hi lai a amaman ka hape, thaa tro jë kö a madrin hnei Iakobo tro Dina nekö i nyidrë, a ce elo memine la itre jajinyi ne Kanana.

Thaa sesëkötre kö së la kola traqa la hulö koi Dina. Öhne fe hi nyipunie cahu trahmanyi ka goeëtili Dina? Sekema la ëje i angeic. Ame ngöne la ketre ijin kola tro hnei Dina troa wang la itre sine ce elo i angeic, hnei Sekema hna xöleuthi Dina me angazone pi la jajinyi angeic. Ewekë lai ka ngazo, pine laka, hna nue hmekuje hi troa ce meköl hnene la trahmanyi me föe, e lue trefëne hë nyidro. Hna traqa la itre hulö atraqatr, pine lai ewekë ka sis hna kuca hnei Sekema.

Ame la kola atre lai hnene la itre xa i Dina, atraqatr la elëhni angatr. Hnene la lue xa i Dina, Simeona me Levi, hna xome jë la isa caa taua i nyidro, me humuth la itre trahmanyi ne la zi i Sekema, me humuthi angatr. Ame hnei nyidro me itre trejin me nyidro, hna humuthi Sekema fe me itre xaa trahmanyi ju kö. Wesitre catr Iakobo kowe la aqane huliwa menu ne la itre nekö i nyidrë.

Nemen la kepin matre traqa pi la itre hulö atraqatr ka tune lai? Hnene hi la hna thele sine ce elo hnei Dina, thene la itre atr ka thaa drengethenge kö la trenge wathebo i Akötresie. Haawe, the xome kö së la tulu i Dina, ene la troa thele la itre sine ce elo ka tune lai.