NTE OMOKỤT mmọ oro Diʹnah akade ndise? Enye aka ndise ndusụk nditọ iban oro ẹdụn̄de ke isọn̄ Caʹnaan. Nte ete esie Jacob eyenem esịt aban̄a emi? Ndin̄wam ẹbọrọ mbụme emi, domo nditi se Abraham ye Isaac ẹkekerede ẹban̄a iban Caʹnaan.

Nte Abraham ama oyom eyen esie Isaac ọdọ n̄wan oto Caʹnaan? Baba, enye ikoyomke. Nte Isaac ye Re·bekʹah ẹma ẹyom eyen mmọ Jacob ọdọ eyenan̄wan Caʹnaan? Baba, mmọ ikoyomke. Nte ọmọfiọk ntak?

Ekedi koro mme owo emi ke Caʹnaan ẹkekpono mme nsunsu abasi. Mmọ ikedịghe nti owo ndinyene nte ebe ye n̄wan, n̄ko mmọ ikedịghe nti owo ndinyene n̄kpere idem nte mme ufan. Ntre nnyịn imekeme nditịm mfiọk nte Jacob idinemke esịt eyen esie an̄wan ndinam ufan ye nditọ iban Caʹnaan emi.

Ke ata akpanikọ, Diʹnah ama odụk afanikọn̄. Nte emekeme ndikụt eren Caʹnaan oro ke ndise esede Diʹnah? Enye ekere Sheʹchem. Usen kiet ke Diʹnah edide esen, Sheʹchem okomụm Diʹnah onyụn̄ enyịk enye adan̄ ye enye. Emi ikọfọnke koro kpa mme ọdọ ndọ kpọt akpana nte ẹdan̄ ye kiet eken. Idiọkn̄kpọ emi Sheʹchem akanamde ye Diʹnah akada osịm uwak mfịna efen.

Ke nditọ eka iren Diʹnah ẹkopde se ikotịbede, esịt ama ayat mmọ etieti. Iba ke otu mmọ, Simʹe·on ye Leʹvi, ẹma ẹtịm ẹyat esịt tutu ẹmen ofụt ẹduk obio oro ẹnyụn̄ ẹsịm irenowo do ke ndueidem. Mmọ ye nditọ eka mmọ iren ẹwot Sheʹchem ye kpukpru irenowo eken. Esịt ama ayat Jacob ye nditọ esie aban̄a idiọkn̄kpọ emi.

Kpukpru mfịna emi ẹketọn̄ọ didie? Edi koro Diʹnah akanam ufan ye mmọ oro mikponoke mme ibet Abasi. Nnyịn idiyomke ndinam utọ mme ufan oro, nte iyeyom?