NDÉPA rehecha mávapepa oho ovisita Dina? Oho ovisita umi mitãkuñáme oikóva Canaánpe. Ombovyʼánepa kóva itúva Jacóbpe? Upéva rekontesta hag̃ua ikatu reñemomanduʼa mbaʼépa opensavaʼekue Abrahán ha Isaac umi kananéare.

Oipotaparakaʼe Abrahán itaʼýra Isaac omenda peteĩ kuñataĩ kananéare? Nahániri. Oipotaparakaʼe Isaac ha Rebeca omenda Jacob peteĩ kananéare? Nahániri. Ndépa reikuaa mbaʼérepa?

Pórke koʼã hénte Canaanpegua oadora ñandejára guaʼúpe. Naiporãivaʼekue hikuái ména ha tembirekorã, ha naiporãi avei amigorã. Upévare ikatu jaikuaa porã Jacóbpe ndogustaihague itajýra ojeheʼa koʼã kananéare.

Upéicharõ Dina oike provlémape. Rehechápa ko taʼangápe pe kananéo omañavahína Dínare? Héra Siquem. Peteĩ díape, Dina ou jave visítape, Siquem omoñeno hendive mbaretépe. Kóva ivai, pórke kuimbaʼe ha kuña omendáva añoite ikatu oñeno oñondive. Ko mbaʼe vai Siquem ojapovaʼekue Dínare ogueru hetave provléma.

Dina ermanokuéra oikuaávo pe oikovaʼekue, ipochyeterei. Umíva apytégui mokõi ipochyetereive, Simeón ha Leví, ha upévare ojagarra hikuái ijespáda ha oike pe siudápe avave ohaʼarõʼỹre. Iñermanokuéra ndive ojuka Siquémpe ha enterove kuimbaʼekuérape avei. Jacóbpe ombopochyeterei upe mbaʼe vai ojapovaʼekue itaʼyrakuéra.

Mbaʼéichapa oñepyrũraʼe ko provléma? Oñepyrũ Dina ojeheʼa rupi umi hénte ndojapóivare Ñandejára heʼíva. Ñande ndajahekamoʼãi umichagua ñane amigorã, ajépa?