Kukwe kira 20

Dina ja mikani kukwe tare te

¿DINA tä basare nirekänti tuin mäi? Monsotre merire nünanka kä Canaán känti ie tä basare. ¿Ye käi namani juto rün Jacob yebätä? Abrahán bätä Isaac ye ie meritre Canaán nämene tuin ño, yebätä mäkwe töbika aune rükai gare mäi.

¿Abrahán tö namani Isaac tuai ja mike gure meri kä Canaán känti yebe? Ñakare. ¿Isaac bätä Rebeca tö namani monsoi Jacob ye tuai ja mike gure meri kä Canaán känti yebe? Ñakare. ¿Ñobätä gare mäi?

Ñan ñobätä aune nitre Canaán nämene ngöbö ngwarbe mike täte. Nitre ye ñaka kwin ja mikakäre gure ben aune ñaka ja ketamuko kwin. Ye medenbätä Jacob ñaka tö namani ngängän ye tuai ja kete meritre Canaán yebe.

Dina ja mikani kukwe tare te. ¿Ni brare bämikani tä Dina mike ñärärä ye tuin mäi? Kädekata Siquem. Dina nikani basare angwane, Siquem käkwe mikani ja dibiti jabe. Kukwe ne abokän käme, ñan ñobätä aune nitre gure metre aibe raba nemen jabe. Siquem käkwe kukwe käme nuainbare Dinabätä ye köböite kukwe mada bäri tare namani bare.

Kukwe ye namani gare Dina ngwaitre ye ie angwane, namani rubun krubäte. Ngwai nibu Simeón bätä Leví, namani rubun krubäte, ngitra diani kwe biti nikani juta yete. Niaratre bätä etebatre käkwe, Siquem aune nitre mada jökrä mürie ketani. Jacob namani rubun monsoitre käkwe kukwe käme nuainbare yebätä.

¿Ñokänti kukwe tare ye namani bare? Dina nämene ja kete nitre ñaka Ngöbö mike täte ben yebätä. Ni ñaka raba nitre ye erere känene ja ketamukore, ¿ñan ererea?

Génesis 34:1-31.