Dina ma hiti moumba
EHUNGI 20
Dina ma hiti moumba
OVE mo munu kutja Dina ma ka ryangera uṋe? Eye ma ka ryangera tjiva wovakazona mba tura mehi raKanaan. Ihe Jakob mape ya a kara nonyuṋe notjiṋa hi? Okutuvatera okuzira epuriro ndi, kondjisa okuzemburuka omuano Abraham na Isak mbwaave ripura ohunga novakazendu vaKanaan.
Abraham u na pa vangere omuzandu we Isak okukupa omukazendu okuza mu Kanaan? Kako, eye ka vangere. Isak na Rebeka va vangere omuzandu wawo Jakob okukupa omukazendu waKanaan? Kako, kave vangere. Ove mo tjiwa kutja omena ratjike?
Omena rokutja ovandu mba mu Kanaan aave rikotamene koomukuru wovisenginina. Owo kava ri ovandu ovawa okukupa nawo, nu wina okukara nawo otja omapanga yoposengo. Mena ranao matu yenene okukara nowatjiri kutja Jakob kena pa ri nonyuṋe omusuko we ma rire epanga novakazona vaKanaan mba.
Nu tjiri, Dina wa hita moumba. Ove mo munu omurumendu Omukanaan motjiperendero ngu ma tara ku Dina? Ena re o Sikem. Eyuva rimwe Dina tje ya okuryanga, Sikem wa kambura Dina ne mu ṋiṋikiza okurara puna ye. Ihi tja ri ouposyo, mena rokutja ovarumendu novakazendu mba kupasana porwe omba sokurara pamwe. Otjiṋa hi otjivi Sikem tja tjita ku Dina tja eta oumba ouingi tjinene.
Ovaṱena va Dina tji va zuva ohunga na mbya tjitwa, owo va pindika tjinene. Vevari vawo, Simeon na Levi va pindikire tjinene nga tji va toora omangaruvyo wawo nave hiti motjihuro nave kambura ovarumendu ngunda ave hiye rirongera. Owo nomarumbi novangu vawo va zepa Sikem novarumendu varwe avehe. Jakob wa pindika tjinene mena rotjiṋa otjivi hi ovazandu ve tji va tjita.
Oumba auhe mbwi wa uta vi? Omena rokutja Dina wa tjita oupanga novandu mbaave ha ṱakamisa omatwako yaMukuru. Eṱe mape ya atu vanga okukara nomapanga nga sana ngo?
