NĨ ŨRONA Dina arathiĩ gũcerera aaũ? Arathiĩ kuona amwe a airĩtu arĩa matũũraga thĩinĩ wa bũrũri wa Kanaani. Nĩ ũkuona ithe Jakubu ta angĩkenio nĩ ũhoro ũyũ? Nĩguo tũhote gũcokia kĩũria gĩkĩ-rĩ, geria kũririkana ũrĩa Iburahimu na Isaaka meeciragia ũhoro wa atumia a Kanaani.

Nĩ ũkuona Iburahimu ta angĩendire mũriũ Isaaka agũre mũirĩtu kuuma Kanaani? Aaca, ndangĩendire. Isaaka na Rebeka-rĩ, nĩ maangĩendire mũriũ wao Jakubu agũre mũirĩtu wa Kanaani? Aaca matingĩendire. Nĩ ũũĩ gĩtũmi?

Gĩtũmi nĩ tondũ andũ aya a Kanaani maahoyaga ngai cia maheni. Matiarĩ andũ ega a kũhikania nao matuĩke athuri kana atumia, o na matiarĩ andũ ega a gũkuruhana nao ta arata. Nĩ ũndũ ũcio tũkĩrĩ na ma atĩ Jakubu ndangĩakenirio nĩ mwarĩ kũgĩa ũrata na airĩtu acio a Kanaani.

Gũtarĩ nganja-rĩ, Dina nĩetonyirie thĩna-inĩ. Thĩinĩ wa mbica-rĩ, nĩ ũrona mwanake ũcio wa Kanaani ũrĩa eeroreire Dina? Rĩĩtwa rĩake nĩ Shekemu. Mũthenya ũmwe Dina athiĩte gũcera-rĩ, Shekemu nĩ aakomire nake kĩa hinya. Ũũ waarĩ ũndũ wa mahĩtia, tondũ no arũme na atumia arĩa mahikanĩtie maagĩrĩirũo nĩ gũkomania. Ũndũ ũyũ mũũru Shekemu eekire Dina warehire thĩna ũngĩ mũnene makĩria.

Rĩrĩa ariũ a nyina na Dina maiguire ũrĩa gwekĩkĩte-rĩ, makĩrakara mũno. Erĩ ao, Simeoni na Lawii, maarakarire ũũ atĩ makĩoya hiũ ciao cia njora magĩtonyerera andũ a itũũra-inĩ materĩgĩrĩirũo. Acio erĩ me hamwe na ariũ a ithe wao makĩũraga Shekemu o hamwe na arũme arĩa angĩ othe. Jakubu nĩ aarakarire tondũ ariũ ake nĩ mekire ũndũ ũcio mũũru.

Thĩna ũyũ wothe waambĩrĩirie atĩa? Tondũ Dina aagĩire ũraata na andũ arĩa mataathĩkagĩra watho wa Ngai. Ũhoro wa ma-rĩ, no twende kũgĩa ũraata na andũ ta acio?