DINAP kikkut ornikkai takusinnaavigit? Niviarsissat Kana’anip nunaani najugaqartut ilaat ornippai. Ataataata Jakobip tamanna iluarissanerpaa? Apeqqut tamanna akiniarlugu Abraham Isakilu arnat Kana’anip nunaaniittut pillugit qanoq isumaqartut eqqaariaruk.

Abrahamip ernini Isak Kana’anip nunaata arnartaasa ilaannik nuliaqquaa? Naagga. Isakip Rebekkallu ernertik Jakob Kana’anip nunaata arnartaasa ilaannik nuliaqquaat? Naagga. Suna pissutaasoq nalunngiliuk?

Kana’animiut guutipilussiortuugamik. Aappartaarinissaat iluassanngilaq, qanimullu ikinngutissaqqissuunngillat. Taava qularutigissanngilarput Jakobip iluarisimanavianngikkaa panimmi arnat Kana’animiut taakku ikinngutigilermagit.

Aammami Dina ajornartorsiulerpoq. Angut Kana’animiu assilissami Dinamik isiginnittoq takusinnaaviuk? Tassa Sikem. Ullut ilaanni Dina pulaarmat, Sikemip Dina tiguaa pinngitsaalillugulu arneriffigalugu. Tamanna pinerlunneruvoq, angutit arnallu katissimasut kisimik atoqatigeeqqusaammata. Sikemip Dinamut ajortuliornera tamanna ajornartorsiuterpassuarnik kinguneqarpoq.

Pisimasoq tusaramikku Dinap qatanngutai kamattorujussuanngorput. Ilaat marluk, Simeon Levilu, ima kamatsigipput pannatik tigoriarlugit illoqarfimmukarlutik angutillu pakasarlugit. Qatanngutaasalu Sikem angutillu allat tamaasa toqorarpaat. Jakobilu kamaqaaq ernini taamaalillutik ajortuliormata.

Ajornartorsiutit tamakkua tamarmik suna aallaqqaatigaat? Tassa Dinap inuit Guutip inatsisaanik naalanngitsut ikinngutigilermagit. Uagut taama ittunik ikinnguteqarniassanngilagut, ilaa?