NANCHI wamona Daina bo abena kuya na kupempula nyi? Ubena kuya na kupempula bansongwakazhi bamo bekala mu ntanda ya Kenana. Nanchi shanji aye Yakoba waumvwine bulongo pa kino nyi? Pa kukumbula buno bwipuzho, eseka kuvuluka Abalahama ne Izaka byo bamonanga banabakazhi ba mu ntanda ya Kenana.

Nanchi Abalahama wakebelenga mwananji wamulume aye Izaka kusongola mwanamukazhi wa mu ntanda ya Kenana nyi? Ine, kechi wakebelenga ne. Nanchi Izaka ne Libeka bakebelenga mwanabo wamulume aye Yakoba kusongola mwanamukazhi mwina Kenana nyi? Ine, kechi bakebelenga ne. Nanchi wayuka kine kintu kyo babujilenga kukeba nyi?

Ke na mambo a kuba bena Kenana bapopwelanga balesa ba bubela. Kechi bajinga bantu bawama kusongwelako nangwa kusongweshako ne. Kabiji kechi bajinga bantu bawama kwisampa nabo bulunda ne. Onkao mambo, twakonsha kuketekela’mba Yakoba kechi kyamutokejile ku muchima pa kumona mwananji wamukazhi waikala ke mulunda na bano banabakazhi bena Kenana ne.

Daina witaine mu lukatazho. Nanchi wamumona uno mwanamulume mwina Kenana pa kipikichala ubena kutala Daina nyi? Jizhina janji Shekema. Juba jimo Daina byoaile na kufwakasha, Shekema wamusendele Daina ne kumukanjikizha kulaala nanji. Kino kyajinga kintu kyatama bingi, mambo bantu besongola bo bonkatu bafwainwa kulaala pamo. Kino kintu kyatama kyo aubile Shekema kwi Daina kyaletele bingi lukatazho.

Bakolojanji Daina byo baumvwine kino kintu, bauminetu ipu na bukaji. Bakolojanji babiji abo ba Shimeona ne Levi, bazhingijile kya kuba bashikwile ne mapoko abo ne kukatwela mu muzhi bantu saka babula ne kuketekelatu ne. Abo ne balongo babo baipayile Shekema ne banabalume bakwabo bonse. Yakoba wazhingijile bingi mambo baana banji baubile kintu kyatama.

Nga ano onse makatazho atendekele byepi? Mambo a kuba Daina wisampile bulunda na bantu babulanga kukokela mizhilo ya Lesa. Nanchi ne atweba tukeba kwisampa bulunda na bantu ba uno mutundu nyi?