KANI wabona abo Dina alukuya mu kufakasyako? Alukuya mu kufakasya kuli bamoye bamo bamo abekala mu calo ca Kanani. Kani Yakobi wisi angasangalala pali cici? Pakweba’ti wasuke ici cakwipusya, esya ukwanuka ifi Ablaamu na Isaci baalukulanguluka pali baba abanakasi ba mu Kanani.

Kani Ablaamu aalukufwaya Isaci umwana wakwe ukuupa moye ukufuma mu Kanani? Koku, taalukufwayapo. Kani Isaci na Libeka baalukufwaya Yakobi umwana wabo ukuupa moye wa mu Kanani? Koku, tabaalukufwayapo. Kani uliisi umulandu?

Ni pa mulandu wakweba’ti aba bantu ba mu Kanani balukupempela tulesa twa bufi. Tabaalipo bantu abaweme abakuupwako neli ukuupa, kabili tabaalipo bantu abaweme abakuba fibusa ifipalamisye. Kansi koti twacetekela ukweba’ti Yakobi taasangalelepo ati umwana wakwe umwanakasi alukupanga bucibusa na baba bamoye ba mu Kanani.

Icinenene, Dina alibele mu kukatasiwa. Kani wamubona mu cikope ulya umwalalume wa mu Kanani uulukulolesya Dina? Isina lyakwe ni Syekemi. Kambi kasuba ili Dina aile mu kufakasya, Syekemi alipintile Dina ne kumupatikisya ukulala naye. Ici calilubene, pakuti balalume ne banakasi abopene ebelelwe ukulala pamo lukoso. Ici cintu icibipile ici Syekemi acitile kuli Dina caliletele amakatasyo naambi aengi.

Ili indume syakwe Dina syaumfwile ifyacitikile, syalikalipile makosa. Syobilo pali syo, Simyoni na Lefai, syalikalipile makosa icakweba’ti syalibulile impoko ne kuya mu musi ne kupwalamukila abalalume. Bo bobilo ne bakwabo balipeye Syekemi na bonse abalalume. Yakobi alikalipile pa mulandu wakweba’ti abana bakwe abalalume balicitile ici cintu icibipile.

Pano ukukatasiwa konse uku kwalitatikile syani? Nipakuti Dina alipangile bucibusa ne bantu abo abatabalukumfwila amafunde abaLesa. Tatulukufwayapo ukupange’fibusa koti ni babo, tali efyenka?

Ifyakutaŋga 34:1-31.