Dina Fi E’yo Ewaru ma Alea
A’DIKO 20
Dina Fi E’yo Ewaru ma Alea
MI NI Dina ni mu a’dipi andri’ari ra ya? Eri mu ezoanzi o’api angu Kanania ’diyi ne. Eri ma ati Yakobo o’a ani ayikosi ra ya? Zita ’di ma omvita isuzu, ama ma ega nga Ibrahimu pi Isaka be ne ndra oku Kanania ’diyi ngoni’ari.
Ibrahimu le ndra i mvi Isaka ma ’du oku Kanania ra ya? Yo, leni ndra ku. Isaka pi Rebeka be le ndra yi ma mvi Yakobo ma du oku Kanania ra ya? Yo, leni ndra ku. Mi ni asisile ni ra ya?
A’dusikuni ’ba Kanania ’diyi ndra mungu inzoru ’diyi inzi azini ovuni ndra agupi azini oku muke ’dinile ni ku dika ovuni ndra agyi muke ’dinile ni ku indi. Ani ama nira ada ada Yakobo o’ani ayikosi i izi ni agyi ’bazu ezoanzi Kanania ’diyi be ri si ku.
Ece kokoru, Dina fi di ndra e’yo ewaru ma alea ra. Ama eco agupi azi ’ba Kanania ni ru ri ne e’da alea ’dia Dina ma mile ega dini ra ya? Eri ma ru Sekemu i. O’du alu Dina ni emuzu ezoanzi ’diyi andrizu ria, Sekemu nga eri obi lazu eri be okpo si. ’Diri e’yo azi onzi ni a’dusikuni agupi pi ecoki yi la oku be ra ka ki eyi je boria. E’yo onzikanyaru Sekemu ni ’yele Dina ma rua ’di eji e’yo ewaru angiri tu.
Dina ma adripika ni e’yo ’di eriria ’bo, a’oko nya eyi saaru. A’oko ni eyi nyazu saaru risi, Simeoni pi Levi be nga sei ’du muzu aku ambo nde ’da ma alea agupi ’daa ’diyi obizu eyini nikokoru. Nga ki Sekemu pi o’di agupi azi ’daa ’diyi pie dria. Yakobo o’a vini a’okisi e’yo onzikanya ru ima anzipi ni ’yele ’di si.
E’yo ewaru ’di e’doki eyi dria ngoni ngoni ya? ’Di e’doki eyi dria Dina ni agyi ’bazu ’ba Mungu ma azita vuti obipi ku ’diyi be risi. Alekini agyi ’dale ri ’bazu ku, ’dini ku ya?
