Njina Mwengila Muukalu
Chihande 20
Njina Mwengila Muukalu
UNAVAMONO ovo Njina anakuya nakutala tahi? Anakuya kuli vana vamapwevo vamwe vamuKanane. Uno ise Yakova amwitavishile tahi? Hakusaka chikwashiwile kukumbulula chihula chino, eseka kwanuka muze vaApalahama naIsaka vamwenenga mapwevo vamuKanane.
Uno Apalahama asakile mwanenyi Isaka kumbata pwevo wakuKanane tahi? Nduma, kasakileko. Nyi Isaka naLaveka, kutala vasakile mwanavo Yakova kukambata pwevo muka-Kanane nyi? Nduma, kavasakileko. Unejiva chuma vakanyinyinenga tahi?
Mwomwo vatu vamuKanane valemeselenga tulunga vamakuli. Kavapwile vatu vamwaza kumbata chipwe kusombokakoko, ngocho kavapwile vatu vamwaza kulikata navoko. Tunafwelela ngwetu Yakova kawahililileko hakumona mwanenyi wapwevo mwalikata navana vamapwevo vamuKanane.
Eyo, Njina engilile muukalu. Unamono lunga muka-Kanane ali hamuvwimbimbi anakushishika Njina nyi? Ikiye Shekeme. Likumbi limwe, Njina hakuya nakutala vakwavo, Shekeme amupikile Njina nakulisavala nenyi. Echi chapwile chakuhenga, mwomwo valunga napwevo valimbata vakivo kaha vatela kusavala hamwe. Upi alingile Shekeme kuli Njina wasangumwine jino pindangano yayinene.
Omwo vandumbwaNjina vamalunga vevwile chuma kanechi, vapihililile. Vosena vavali, naShimeyone naLevi, hakwivwa matoto, vambachile mikwale nakuya kunganda yize nakuvatuluka vatu. Vakivo navandumbwavo vatapile Shekeme namalunga vakwavo. Yakova apihililile mwomwo vana venyi valingile chuma chachipi.
Uno pindangano yoseneyi yafumine haka? Yafumine hausepa waNjina alikwachile navatu kavononokelenga jishimbi jaKalungako. Katwasakile kukalikata namasepa vanganako, ngwetu?