¿NTILA, mo ntlome, jatumel ma pon Dina? Atz ma pon kyukʼe qejo txin te Canaán. ¿Bʼaʼnpetzulo jlu toj twitz Jacob? Aju kʼonil tiʼja tuʼn ttzaqʼwet xjel lu, aju qa ma tzaj tnaʼne alkyetoq t-xim Abrahán ex Isaac kyiʼj qeju xuʼj te Canaán.

¿Tajpetzuleteq Abrahán tuʼn tmojeʼ Isaac tukʼe jun txin te Canaán? Nya tajtoq. ¿Tajteqpetzulo Isaac tukʼe Rebeca tuʼn tkubʼ mojeʼ Jacob tukʼe jun xuʼj te Canaán? Nya kyajtaq. ¿Bʼiʼn tuʼne tiquʼn?

Tuʼnjo nchi kʼulunteq xjal lu kywitz nya axix dios. Nya tbʼanel xjalqetoq tuʼn kyok te chmilbʼaj ex te xuʼjilbʼaj, ax ikx nya tbʼanelqeteq tuʼn kyok te qamiw. Tuʼntzen jlu, nel qnikʼ tiʼj tiquʼn mya bʼaʼntaq nela tuj twitz Jacob, tuʼn t-xi Dina jyol kyiʼj txin te Canaán tuʼn kyok te tamiw.

Ax Dina tzaj jyonte mya bʼaʼn. ¿Ntila toj tilbʼilal aju xjal te Canaán nkintz tiʼj Dina? Siquem tbʼi xjal lu. Jun maj tej tpon Dina kyukʼe txin lu, tzaj ttzyuʼn Siquem Dina tuʼn tkubʼ kuẍeʼ tukʼe. Nya bʼaʼn jlu, quʼn oʼkx qeʼ xjal aʼyeju o chi kubʼ mujeʼ jaku bʼant tuʼn kykubʼ kuẍe junx. Aju bʼant tuʼn Siquem tiʼj Dina, tzaj nimkutl mya bʼaʼn tuʼn jlu.

Tej tok kybʼiʼn t-xibʼan Dina tiʼ oteq bʼaj, tzaj nim kyqʼoj. Aʼyexix Simeón ex Leví, e jaw qʼojlexix, ex xi kyiʼn ky-espada ex mitiʼtoq ximen kyuʼn xjal tej kyokx tuj tnam ex kubʼ kybʼiyoʼn Siquem. Ax ikx qeʼ txqantl t-xibʼan Dina kubʼ kybʼiyoʼn aqejo txqantl xinaq tuj tnam. Tzaj nim tqʼoj Jacob tuʼnju bʼant kyuʼn tkʼwaʼl.

¿Tiquʼn tzaj tkyaqil mya bʼaʼn lu? Tuʼnjo ok Dina te kyamiw xjal aʼyeju mitiʼteq nokx kybʼiʼn tkawbʼil Dios. Atzun qe, mya bʼaʼn tuʼn qjyon kyiʼj qamiw ik tzeʼn qeju tamiw Dina ten.