ATIʼYANÍ ʼyáni xi tífikonsíle Dina. Je xtiyánchjín xi ya tsʼe ʼnde Canaán. A sasén xótsele Jacob je nʼaile. Je xi koasenkaoli nga koa̱njinli xi tʼatsʼe jebi kuinga sikjaʼaitsjain jósʼin kisikjaʼaitsjen Abraham kao Isaac xi tʼatsʼe yánchjín xi ya tsʼe Canaán.

A koanmele Abraham kʼianga jngo tsoti xi ya tsʼe Canaán chixankao Isaac. Mai. A koanmele Isaac kao Rebeca kʼianga Jacob jngo tsoti xi ya tsʼe Canaán chixankao. Mai. A ʼyaní ánni.

Kuinga niná ndiso tsakʼétsʼoale je chjota xi ya tsʼe Canaán. Likui nda chjota koan kʼoa kuinga tsín koansíni nga je chixankao kʼoa kʼoati tsín koansíni nga je kisimiyo. Kuinga tsín jao tjínsíniná nga tsín kisasenle Jacob kʼianga je kisimiyo Dina yánchjín xi ya tsʼe Canaán.

Kjoa kiskajin Dina. Jaon, a tiʼyaní chjota xokji tíkotsenle Dina xi ya tsʼe Canaán. Siquem ʼmi. Jngo nichxin nga ya kichó Dina, je Siquem tsakʼénele nga tsakajnakao. Nʼio chʼaotjín jebi, nga tojéní chjota xi je kabixan xi ma fayokao xínkjín. Jmeni xi kisikao Siquem je Dina tse kjoa kichomani.

Kʼianga kisʼejinle ndsʼe Dina jme xi koantʼain, nʼio koanjtile. Je Simeón kao Leví, kʼianga nʼio toxkia koanjtile, kiskoe kicha espadale, kʼoa likui ʼya xi tjíojinle nga jaʼasʼen ya Canaán. Simeón kao Leví kʼoa kao ndsʼe xi ngikʼa kisikʼien Siquem kʼoa kao ngatsʼi chjota xi xʼin. Jacob nʼio koanjtile kʼianga kʼoasʼin kjoa tsakajngi xtile.

Jósʼin kitsʼiani ngayeje kjoa jebi. Totʼatsʼení kʼianga je kisimiyo Dina je chjota xi tsín sítjoson kjoatéxomale Niná. Likui je simiyoaa chjota xi kʼoasʼín. A tsí mai.