¿MNIJÄˈÄP pënatyë tyäˈädë toˈoxyˈënäˈk diˈib yamë Dina kyuˈijxypy? Yëˈë diˈib tsënääytyëp Kanán. ¿Yˈoyˈijxëdaa ja tyeety? Pën mnijawëyaampy, tsojkëp xyjamyatsët wiˈix wyinmääyë Abra̱a̱n mëdë Isa̱a̱ mä ja toxytyëjkëty diˈib Kanán.

¿Tyukmëtsojkë Abra̱a̱n etsë myäänk Isa̱a̱ tpëkët tuˈugë kiixy diˈib Kanán? Kyaj. Etsë Isa̱a̱ mëdë Rebekʉ, ¿tyukmëtsojkë myäänk Jakoob tpëkët tuˈugë kiixy diˈib Kanán? Nan kyaj. ¿Mnijäˈäp tiko?

Yëˈko ja jäˈäyëty diˈib Kanán yëˈë yˈawdäjttëbë dios diˈib kyaj tyëyˈäjtënëty. Kyaj yˈoyjyaˈayˈattë ets yajpëkët o yajmëtnaymyaayëbëˈatët. Pääty mbäät njaygyujkëm ko ja Jakoob kyaj tˈoyˈijxy ko ja nyëëx nyaymyayëty mët ja toˈoxyˈënäˈk diˈib tsënääytyëp Kanán.

Dina nayjotmaymyooyë. ¿Mbäät xyˈixy tyäˈädë mixy diˈib yam yˈijxypyë Dina? Ja txëˈäjty Sikem ets jam tsyënääjy Kanán. Tëgok mä nety jamë Dina tkuˈixyë ja toˈoxyˈënäˈk, ta Sikem yˈaguanëˈäjtë ets mëët nyaygyoˈogëdët. Axëëk dëˈën yˈadëtstë yëˈko yëˈëyë mbäät nyaygyoˈogëdë yetyëjk mëdë toxytyëjk diˈib të pyëjknëdë. Ko dëˈënë Sikem yˈadëtsy ta net myiiny mëjwiin kajaajë amay jotmay.

Ko ja myëgaˈaxëtyë Dina tnijäˈäjëdë ti nety të tyuny të jyatyëty, ta myëkjotˈambëjktë. Pën niˈigyë jotˈambëjktë yëˈë Simeonk mëdë Leví, ta ak mëdë yˈespäädë tyëjkëdë ajotkumonë mä ja käjpn, ta dyaˈoˈktë ja Sikem. Ta net ok jyäjttë ja myëgaˈaxëty ets dyaˈoˈktääytyë niˈamukë ja yetyëjk. Mëk ja Jakoob jyantsy jotˈambejky ko dëˈën yˈadëtstë ja yˈuˈunk yˈënäˈk.

¿Wiˈixën tsyondaktääjy tëgekyë tyäˈädë amay jotmay? Yëˈë dëˈën ko ja Dina nyaymyaaybyëjkë mëdë jäˈäy diˈib kyaj tmëmëdoyë Diosë yˈanaˈamën. Ëtsäjtëm kyaj mbäät naymyaˈayëm mëdë jäˈäy diˈib kyaj tmëmëdoyë Dios, ¿këdii?