Dina Pât Nani Ra Diman
Sturka 20
Dina Pât Nani Ra Diman
DINA anira auya ba kaikisma ki? Witin Kenan tasbaia ra tyara nani iwi kan ba ra kaikaia auya. Sakuna Jekob ba naha dukyara lilia kan lukisma? Naha ansika yabaia sa kaka, kaisa Ebraham bara Aisak wal Kenan mairka nani dukyara dia luki kan ba kaikaia.
Ebraham brinka kan ki, ai luhpia Aisak ba Kenan mairka kum wal marit takbia? Apia pali. Aisak Rebika wal brinka kan ki, ai luhpia Jekob ba Kenan mairka kum wal marit takbia? Apia pali sin. Dia muni sapa nu sma ki?
Kenan uplika nani ba gâd kuninkira nani ra mayuni kan. Witin nani ba upla pain apia kan ai maîa waitna apia kaka ai maîa mairin baku briaia, bara pana baku bri kaia dukyara sin upla pain apia kan. Baha mita yawan pain nu sa Jekob ba ai luhpia mairin ba Kenan uplika nani panika kabia ba want apia kan.
Baha mita Dina ba pât nani ra diman. Kenan waitnika kum mita Dina ra kaiki ba lilkika ra kaikisma ki? Witin nina Sikem maki kan. Yu kum Dina ba Kenan uplika nani ra kaikaia wisi wan taim, Sikem mita alki rug munan. Bara naha ba pain apia kan, kan mairin kum waitna kum wal marit takan ba baman wal prawaia sip sa. Bara Sikem mita Dina ra baku munan ba wina, pât nani ailal takan.
Dina lakrika nani ba naha daukan walan pyua ra, uba ai kupia sauhkan. Bara lakrika nani tila wina Simeon wihki Libai wal uba ai kupia sauhki, sord ai mihta ra brih uplika nani dara walras taunka bilara diman. Bara witin ai muihka nani aikuki, Sikem bara waitna wala nani bara kan sut ra iki bangwan. Bara Jekob ai luhpia nani baku daukan ba dukyara uba ai kupia sauhkan.
Sakuna pâtka sut ba nahki ta krikan ki? Dina Gâd bila walras uplika nani aikuki, ai panika bri kan ba mita. Rait apia baha sat panika plikaia apia sa?
