UA MONO veya Ndina a li na ku ya mu ku meneka ni? Ali na ku ya mu ku mona vamo vana va vampuevo mu cifuti ca Kanana.Vuno Ise Yakomba a ka viukilila omo aka vi ivua, ni? Linga u hase ku uana cikumbulula, aci vuluke via handekele Avilahama na Isake ku tuala ha vampuevo va mu Kanana.

Vuno Avilahama ua tavele muaneni Isake ku ambata muana mpuevo ua mu Kanana ni? Houe. Vuno Isake na Lembeka va tavesele muanavo Yakomba ku ambata muana mpuevo ua ku Kanana ni? Houe ka va tavele. Ua tantekeya omo lia vika?

Va vianene muomu vakua Kanana va puile vakua ku lemesa vanjambi va makuli. Ka va puile vantu va cili ku lihangela navo cipue ku likuata navo vusamba. Mua vusunga Yakomba ka ca mu ile ku mutima omo muaneni ua mpuevo ua likuatele vusamba na vana va vampuevo va mu Kanana.

Ndina ua likovelesele mpundu mu vukalu. Ua mono ou yala mukua Kanana na tala toma kuli Ndina, ha fikula ni? Lizina lieni Sekeme. Tangua limo omo Ndina uezile mukua ku meneka va vusamba veni mu Kanana, Sekeme ua mu kuatele ku ndzili na ku kosa neni. Eci ca puile vuhenge vua kama muomu yala na mpuevo vaze kanda va liambate ka va pandele ku kosa hamo. Ovu vupi vua lingile Sekeme kuli Ndina, vua kokele vukalu vua vuingi.

Omo vamuanaye ya Ndina va ci vuile, va nienguele cikuma. Vunoni vavali ha kati kavo, Simeone na Levi, va nienguele cikuma-kuma ngeci va ile na mikuale yavo kaha va ka kovelele mu mbonge, va ka lingile ku va tungumuna. Vakevo na vamuanaye kaha va ka tsihile Sekeme na vamala vakuavo vose. Yakomba ua tenukile muomu vana veni va lingile mua ku pihia.

Vuno vati vua putukile vukalu vuose ovu? Muomu Ndina ua likuatele vusamba na vantu ka ve ku niunga masiko a Njambi. Ka tua pandele ku likuata vusamba na vantu va cifua eci, ni vati?