WASWE, iu lukim hu nao Diʹnah hem go for visitim? Hem go for lukim samfala gele wea stap long Caʹnaan. Waswe, iu ting dadi bilong hem Jacob hem hapi long diswan? For helpem iumi ansarem disfala kwestin, trae for rememberim tingting bilong Abraham and Isaac abaotem olketa woman bilong Caʹnaan.

Waswe, Abraham laekem son bilong hem Isaac for maritim wanfala gele from Caʹnaan? Nomoa, hem no laekem. Waswe, Isaac and Re·bekʹah laekem son bilong tufala Jacob for maritim wanfala gele from Caʹnaan? Nomoa, tufala no laekem tu. Iu savve why nao olsem?

Hem from pipol bilong Caʹnaan worshipim olketa giaman god. Olketa no gudfala pipol for tekem olsem hasband or waef, and olketa no gudfala pipol for fren gud witim tu. So iumi savve nao hao Jacob hem no hapi witim wei wea dota bilong hem fren witim olketa gele bilong Caʹnaan.

Gogo, Diʹnah insaed trabol nao. Waswe, iu savve lukim datfala man bilong Caʹnaan long piksa wea lukluk long Diʹnah? Nem bilong hem Sheʹchem. Wanday taem Diʹnah kam for visit, Sheʹchem tekem Diʹnah and forcem hem for leidaon witim hem. Diswan hem rong, from olketa marit man and woman nomoa fit for leidaon tugeta. Disfala nogud samting wea Sheʹchem duim long Diʹnah hem mekem plande trabol moa kamap.

Taem olketa brata bilong Diʹnah herem samting wea happen, olketa kros fogud. Tufala long olketa, Simʹe·on and Leʹvi, wea barava kros tekem sword and go long taon and kasholem olketa man taem olketa no redi. Olketa and olketa brata bilong olketa killim dae Sheʹchem and evri nara man long there. Jacob hem kros fogud bikos olketa son bilong hem duim disfala nogud samting.

Hao nao evri trabol hia start? Hem from Diʹnah fren witim pipol wea no obeyim olketa law bilong God. Iumi nating want for fren witim pipol olsem, iaman?