TE KITE ra koe e koai ta Dina e aere atura i te akara? Te aere ra aia i te akara i te au tamaine e noo ra i roto i te enua o Kanaana. Ka rekareka ainei tona papa ko Iakoba i teia? Ei tauturu ia tatou i te pau i teia uianga, e akamaara ana e eaa te manako o Aberahama raua ko Isaaka no runga i te au vaine o Kanaana.

Kua inangaro ainei a Aberahama i tana tamaiti ko Isaaka kia akaipoipo i tetai tamaine Kanaana? Kare. Kua inangaro ainei a Isaaka raua ko Rebeka i ta raua tamaiti ko Iakoba kia akaipoipo i tetai tamaine Kanaana? Kare. Kua kite koe e no teaa?

No te mea e akamori ana te au tangata i Kanaana i te au atua pikikaa. Kare ratou i te au tangata meitaki i te akaipoipo ei au tane e ei au vaine, e kare ratou i te au tangata meitaki ei au oa piri tikai. No reira, papu ia tatou e kare a Iakoba e mareka e te akariro nei tana tamaine i teia au tamaine Kanaana ei au oa nona.

Tika atu rai, kua o a Dina ki roto i te manamanata. Te kite ra koe i tera tangata Kanaana i roto i te tutu e akara ra ia Dina? Ko Sekema tona ingoa. I tetai ra i te aere anga mai a Dina i te ori aere, kua opu a Sekema iaia e kua moe atu kiaia. E tarevake teia, no te mea ko te au tane e te au vaine akaipoipo ua te ka tau kia moe kapiti. Kua taki atu teia angaanga kino ta Sekema i rave kia Dina, ki te au manamanata maata roa atu.

I te akarongo anga te au tungane o Dina i tei tupu, kua riri tikai ratou. E rua, ko Simeona e Levi, no to raua riri, kua rave raua i te koke e kua aere atu ki roto i te oire i te opu poitirere ua i te au tangata i reira. Kua tamate raua e to raua au teina ia Sekema e te au tangata pouroa. Kua riri a Iakoba no tei rave tana tamariki i teia angaanga kino.

Akapeea ra teia au manamanata pouroa i te akamata anga? Akamata mai te reira i te akaoa atu anga a Dina i te au tangata kare e akono ana i te au ture a te Atua. Kare tatou e inangaro i te reira au tu oa, me kare ainei?