DIINA ayeoowa hadhanni nooro afootto? Kanaˈˈaani gobbara heeˈranno seenni ledo godoˈlitara hadhanni no. Annise Yaaqoobi hakka haˈrase baxinokka? Tenne xaˈmora dawaro afiˈrate, Abirahaaminna Yisaaqi Kanaˈˈaani seennira mayi lao noonsaro hedi.

Abirahaami beettisi Yisaaqi Kanaˈˈaani seenne adhara hasiˈrinoni? Dihasiˈrino. Yisaaqinna Ribiqa beettinsa Yaaqoobi Kanaˈˈaani seenne adhannota baxxinoni? Dibaxxino. Mayiraatiro afootto?

Korkaatuno Kanaˈˈaani manni kaphphu maganna magaˈnannohuraati. Kuni manni ayiddaannanna ayiddaama assiˈnanniha qoleno muli fiixa assiˈnanniha diˈˈikkino. Konni daafira Yaaqoobi, beettosi Kanaˈˈaani seenni ledo jaalooma kalaqirase baxannokkiti egennantinote.

Diina qarru aana uwase digattino. Misilete aana Diina laˈˈanni nooha Kanaˈˈaani beetto laitto? Suˈmisi Seekeemiiti. Mitto barra Diina godoˈlitara dagganna, Seekeemi amade ledosi goxxanno gede giddeessise. Tenne assasi soˈrote; korkaatuno meyaatinna labbaahu mitteenni goxa dandiitannohu adhanturo callaati. Seekeemi Diinara assinohu kuni bushu coyi wole roore qarrano abbino.

Diina roduuwi iillinosere macciishshitu yannara lowo geeshsha hanqitu. Simiooninna Leewi lowo geeshsha hanqitinohura bise adhite Kanaˈˈaani katama hadhu; marteno labballo hayyotenni amaddu. Lamunku, wolootu roduuwinsa ledo Seekeeminna woloota labballo baala shite guddu. Yaaqoobi oososi konne busha coye assitinohura hanqi.

Kuni baalu qarri dayinohu mayinniiti? Kuni qarri dayinohu Diina Maganu hajajo ayirrisannokki manni ledo jaaloontinohuraati. Ninke togoo manni ledo jaalooma kalaqira dihasiˈneemmo; hasiˈneemmoni?