LÁ NATAYÁÁ tsíin ejkha̱ gáʼñun Dina ráʼ. Na̱jkha̱ gáʼñun tikhun waʼxaʼ bi̱ kuwa náa ku̱ba̱ʼ ndrígóo Canaán. Lá maʼdxuu anu̱u̱ Jacob xáʼ. Mbá rí mambáyaaʼ maxtiʼña̱a̱ graxe̱ rígi̱ dí mataʼgímináʼ marmáʼáan a̱jkia̱nʼ dí nindxa̱ʼwáminaʼ Abrahán ga̱jma̱a̱ Isaac ga̱jma̱a̱ numún gu̱ʼu̱ bi̱ kuwa náa Canaán.

Lá nindoo Abrahán rí a̱ʼdióo Isaac manigúnʼ ga̱jma̱a̱ mbáa wáxa bi̱ xtáa náa Canaán ráʼ. Na̱nguá. Lá nindoo Isaac ga̱jma̱a̱ Rebeca rí a̱ʼdióo Jacob manigúnʼ ga̱jma̱a̱ mbáa wáxa bi̱ xtáa náa Canaán ráʼ. Na̱nguá. Lá natayáá náa numuu ráʼ.

Numuu rí xa̱bu̱ Canaán nduyamajkún dios bi̱ ragájkhun. Raʼkhíin xa̱bu̱ míjínʼ matatsiʼgúnʼ o matanujúnʼ gajmiáanʼ, ga̱jma̱a̱ na̱nguá ni̱ndxu̱ún xa̱bu̱ míjínʼ mambaxáaʼ májánʼ gajmiáanʼ. Ikha jngó nduʼyáá gajkhun rí Jacob xániguʼ rí wáxioo mambaxúu gajmíi̱n waʼxaʼ bi̱ kuwa náa Canaán.

Xúʼko̱, Dina nikudaminaʼ náa xkujndu. Lá nandoo natayáá dxámá bi̱ xtáa náa Canaán bi̱ kamaa náa kiʼniriyaʼ rígi̱ bi̱ xtáa raʼyoo Dina ráʼ. Ikhaa mbiʼyuu Siquem. Mbóo mbiʼi índo̱ rí Dina ni̱ʼkha̱ gáʼñun, Siquem nigugua ga̱jma̱a̱ tsiakii Dina rí mabóóʼ ga̱jma̱a̱. Raʼkhí kayuʼ ninindxu̱u̱, numuu rí i̱ndó xa̱bekha ga̱jma̱a̱ gu̱ʼu̱ bi̱ nidamijná gíʼmaa rí mubu̱nʼ mbó. Dí raʼkhí dí niʼniuu Siquem Dina niʼni marigá wéñuʼ xkujndu.

Índo̱ a̱ngui̱i̱n Dina nidxawíín dí nirígá, nikiʼníin wéñuʼ. A̱jmi̱i̱n dí ikhiin Simeón ga̱jma̱a̱ Leví, nikiʼníin wéñuʼ, rí asndu niyégun chídí, mu mbá nacha̱ gátuʼu̱u̱n náa xuajin. Ikhiin gajmiún eʼwíínʼ a̱ngiu̱ún nixiyáa Siquem ga̱jma̱a̱ xúgínʼ xa̱bekha. Dí raʼkhí ni̱ni̱ e̱ji̱i̱n Jacob niʼni dí makiʼnáa wéñuʼ ikhaa.

Xú káʼnii nigíʼdu̱u̱ xúgíʼ xkujndu rígi̱ rá. Rí niʼni Dina ndiñíinʼ mambaxúu gajmíi̱n xa̱bu̱ bi̱ tsénimbu̱ún xtángoo ndrígóo Dios. Ikháanʼ xúʼñíinʼ xa̱bu̱ xúʼko̱ káʼnii mambaxúluʼ gajmiúlúʼ, lá ragájkhun ráʼ.