20-нҗи хекая

Дина бетбагтчылыга учраяр

СЕРЕТ, Дина кимиңкә мыхманчылыга баряр? Ол Кенган юрдунда яшаян гызларың янына баряр. Бу атасы Якуба ярардымы? Ядыңдамы, Ыбрайым билен Ысхак кенганлы гызлар барада нәме пикир эдйәрди?

Эйсем, Ыбрайым оглы Ысхагың кенганлы гызлара өйленмегини иследимикә? Элбетде, ислемеди. Онда Ысхак билен Ребека оглы Якубың кенганлы гызлара өйленмегини иследимикә? Ёк, ислемедилер. Онуң себәбини билйәңми?

Себәби Кенганың яшайҗылары ялан таңрылара сежде эдйәрдилер. Кенганлылар билен дурмуш гурмак ве достлашмак боланокды, себәби олар говы адам дәлди. Шонуң үчин Динаның кенганлы гызлар билен достлашяныны билсе, Якуп халамазды.

Элбетде, Дина бетбагтчылыга учрады. Суратда Дина середип дуран кенганлы йигиди гөрйәңми? Онуң ады Шекем. Бир гезек Дина мыхманчылыга геленде, Шекем оны зорлап, өзи билен ятырды. Бу агыр гүнәди, себәби диңе өйленен адам өз аялы билен биле ятып билйәр. Шекемиң Динаны зорламагы бетбагтчылыга элтди.

Динаның доганлары болан ваканы эшиденде, гаты гахарландылар. Эсасан-да, Шимеон билен Леви элине гылыч алып, шәхере дуйдансыз гирип, яшайҗыларына топулдылар. Олар бейлеки доганлары билен билеликде Шекеми ве шәхердәки эркек адамлары өлдүрдилер. Бу залымлык Якубың гахарыны гетирди.

Йөне бетбагтчылыгың бары нәмеден башланды? Себәби Дина Худайың канунына гулак асмаян адамлар билен достлашды. Биз бейле адамлар билен достлашмак исләмизок, шейле герек?

Барлык 34:1—31.