¿WAN maʼ xa wila maʼ wajum yulatajel ja Dina? Wajum yulatajel jujuntik akʼixuk bʼa slujmal Canaán. ¿Lek maʼ oj yabʼ ja Jacob ja jas wan skʼulajeli? Bʼa oj skoltaya sjakʼjel ja sjobʼjel it jaʼ oj juluk akʼujol ja jasa wa spensarane ja Abrahán sok ja Isaac sbʼaja ixuke bʼa Canaán.

¿Skʼana maʼ ja Abrahán ja yunin, Isaac, oj nupanuk sok jun ixuk bʼa Canaán? Miyuk. ¿Wan maʼ xa naʼa jas yuj mi skʼanaweʼi?

Yujni ja ixuk winike bʼa Canaani wa xyaʼteltaye kʼulubʼal dyos. Mini lek nupanelesok, chomajkil mini lekuk sjipjelskʼujol smoke sok smojtajele. Ja yuj wani xbʼobʼ kaltik ja Jacob mini lek oj yil ja Dina jawa smojtay ekʼ ja akʼixuk bʼa Canaán.

¡Jaʼi! Ja Dina xchʼikani sbʼaj wokola. ¿Wan maʼ xa wila ja bʼa dibujo ja tan winik wan skʼeljel ja Dina? Sbʼiʼil Siquem, ti sbʼaj bʼa Canaán. Jun kʼakʼu yajni ja Dina waj yulatay ja akʼixuk bʼa Canaani, ja Siquem taregani stʼena bʼa oj way soka Dina. Ja jas skʼulaneʼi mini tʼun lekuka, pes kechanta ja matik nupaneleʼi wa xbʼobʼ skʼuluke ja jaw. Ja jas skʼulan ja Siquem sbʼaja Dina ijijan yile jitsan wokol.

Yajni ja smoj-alijel jumasaʼ ja Dina yabʼye ja jas ekʼi, jel tajkiye. Chawane ja bʼa yeʼnleʼi, ja Simeón sok ja Leví jel kʼe skorajaʼe, ja yuj sok yespadaʼe wajye sok junta chʼaykʼujol ochye ja bʼa chonabʼi. Ja yeʼnle sok ja tuk smoj-alijel jumasaʼ smilawe ja Siquem sok yibʼanal ja winike jumasaʼ. Ja jasa skʼulane ja yuntikil ja Jacob jel yawe tajkuk ja stati.

¿Jastal kʼejan ja wokol jumasaʼ it? Kʼejan yuj ja Dina jel kʼubʼan ajyi sok ixuk winik mi skʼuʼane ja smandar ja Dyosi. Ja yuj ja keʼntiki mini lekuk oj jmojtaytik ixuk winike jastal yeʼnle, ¿anke meran?