Ni a zwi vhona uri Dina u khou ya u dalela vhonnyi? U khou ya u vhona vhaṅwe vha vhasidzana vha dzulaho shangoni ḽa Kanana. Naa khotsi awe Yakobo o vha a tshi ḓo zwi takalela? U thusa u fhindula mbudziso iyi, lingedzani u humbula zwe Abrahamu na Isaka vha humbula nga ha vhasadzi vha Kanana.

Naa Abrahamu o ṱoḓa uri murwa wawe Isaka a vhinge musidzana wa Kanana? Hai. Naa Isaka na Rebeka vho ṱoḓa murwa wavho Yakobo a tshi vhinga musidzana wa Mukanana? Hai. Ndi ngani?

Ho vha hu ngauri vhathu vha Kanana vho vha vha tshi rabela midzimu i sili. Vho vha vhe si vhathu vhavhuḓi u vha navho sa vhanna na vhasadzi, na u vha navho sa dzikhonani. Ngauralo ri nga khwaṱhisa uri Yakobo o vha a sa ḓo takadzwa nga uri ṅwananyana wawe o vha a tshi ita vhukonani na avha vhasidzana.

Vhukuma, Dina a dzhena khomboni. Ni a mu vhona uḽa munna wa Mukanana a re tshifanyisoni a khou sedzaho Dina? Dzina ḽawe ndi Sikeme. Ḽiṅwe ḓuvha musi Dina o ḓa u dala, Sikeme a dzhia Dina a mu kombetshedza u lala nae. Hezwi zwo vha zwo khakhea, ngauri ndi munna na musadzi vho vhinganaho fhedzi vhane vha nga lala vhoṱhe. Tshithu itshi tshivhi tshe Sikeme a ita kha Dina tsha isa khomboni nnzhi yo engedzeaho

Musi khaladzi dza Dina dzi tshi pfa zwo iteaho, dza sinyuwa zwihulu. Vhavhili vhavho, Simeoni na Levi, vho vha vho sinyuwa lwe vha dzhia mabanga vha dzhena muḓini vha fara vhanna vha songo humbula. Vhone na vharathu vhavho vha vhulaha Sikeme na vhaṅwe vhanna vhoṱhe. Yakobo a sinyuwa

Khombo iyi yoṱhe yo thoma hani? Ndi ngauri Dina o ita dzikhonani na vhathu vhe vha si thetshelese milayo ya Yehova. A ri nga ḓo ṱoḓa u vha na khonani dzo raloho, ri ḓo zwi ṱoḓa?

Genesi 34:1-31.