NAKIKITA mo ba dinhi hini nga retrato kon hin-o an gindadaop ni Dina? Oo, makikigkita hiya ha mga daraga nga naukoy ha tuna han Kanaan. Ha imo hunahuna, malilipay ba an iya tatay nga hi Jakob kon mahibaro mahitungod hini? Basi mabaton ini nga pakiana, hinumdumi an panhunahuna nira Abraham ngan Isaak mahitungod ha kababayin-an ha Kanaan.

Nadiri hi Abraham nga mag-asawa an iya anak nga hi Isaak hin taga-Kanaan. Ngan nadiri liwat hira Isaak ngan Rebeka nga an ira anak nga hi Jakob mag-asawa hin taga-Kanaan. Maaram ka ba kon kay ano?

Tungod kay an mga taga-Kanaan nagsisingba ha palso nga mga dios. Diri hira maopay nga magin bana ngan asawa, o magin duok nga mga sangkay. Salit, sigurado kita nga diri malilipay hi Jakob nga an iya anak nga hi Dina nakikisangkay hini nga mga daraga nga taga-Kanaan.

Sugad la han ginlalaoman, nagkaproblema hi Dina. Nakikita mo ba dinhi ha retrato an lalaki nga taga-Kanaan nga nagkikinita kan Dina? Sikem an iya ngaran. Usa ka adlaw han binisita hi Dina, ginpirit hiya ni Sikem nga dumirig ha iya. Sayop ini tungod kay an mag-asawa la an puydi magdirig. Ini nga maraot nga ginbuhat ni Sikem kan Dina nagresulta hin mas daku pa gud nga problema.

Han hinbaroan han kabugtoan nga kalalakin-an ni Dina an nahitabo, nasina gud hira. Duha ha ira, hira Simeon ngan Lebi, an nasina gud salit kinadto hira ha syudad nga may-ada dara nga mga espada ngan tigda nga ginsulong an kalalakin-an. Ginpatay nira ngan han ira iba nga kabugtoan hi Sikem ngan an ngatanan nga kalalakin-an. Nasina gud hi Jakob tungod hini nga maraot nga ginbuhat han iya mga anak.

Ano an tinikangan hini nga mga problema? Tungod kay hi Dina nakisangkay ha mga tawo nga diri nasunod ha mga balaud han Dios. Diri naton karuyag nga magkaada hin sugad nga mga sangkay, diri ba?