Tantara 20

Sahiran̈a Dina

HAINAO azôvy olo handeha zahan’i Dina io? Man̈angin’i Kanana. Amparavoravo babany edy raha ataony io? Tsaraova fahitan’Abrahama ndreky Isaka man̈angin’i Kanana.

Tian’Abrahama ma Isaka zanany hanambady man̈angin’i Kanana? Tsy tiany. Tian’Isaka ndreky Rebeka ma Jakoba hanambady man̈angin’i Kanana? Tsy tian-drô koa. Mba hainao ino antony?

Fôtony olo ta Kanana tao, nanompo zan̈ahary tsy izy. Irô io sady tsy tsara atao vady, tsy tsara atao kamarady. Matoky atsika fa Jakoba tsy mety ho ravoravo amy zanany nikamarady man̈angy kananita aby io.

Tôjy raha amy zay baka Dina. Hitanao lelahy kananita araiky amy sary io, rikian̈a mizaha Dina? Sekema an̈arany. Tandraraiky, Dina nandeha tan̈y karaha fataony in̈y, nantsoritin’i Sekema, baka iô nandriany. Ratsy raha zen̈y, fôtony lelahy ndreky man̈angy fivadiany fo mety miaraka mandry. Raha tsy manjary nataon’i Sekema tamy Dina io, nahavy ra-manahiran̈a hafa koa.

Anadahin’i Dina aby io koa fa naharen̈y raha zen̈y baka, neloko farany mare. Simeona ndreky Levy ten̈a neloko. Nalain-drô mesoben-drô, baka iô irô nandeha tan-tanàna tan̈y, tamy lera tsy nampoizin-drô tao. Nivonen-drô Sekema ndreky lelahy maro hafa koa. Jakoba neloko tamy zanany aby io, fôtony ratsy raha nataon-drô.

Ino nahavy raha jiaby zen̈y? Dina nikamarady tamin’olo tsy man̈araka lalàn̈an’ny Zan̈ahary. Atsika tsy tôkony tia kamarady karaha zen̈y, sa karakôry?

Genesisy 34:1-31.