ANA akwawona ŵakwajawulila Dinawo? Akwawula kukunguluka ni ŵali ŵakusatama m’cilambo ca Kanani. Ana babagwe casangalale nayo yeleyi? Kuti ajanje ciwusyoci cenene, alinje kumbucila mwaŵawonelaga acakongwe ŵa ku Kanani Abulahamu ni Isaki.

Ana Abulahamu ŵakundile kuti mwanagwe Isaki alombele jwamkongwe jwa ku Kanani? Iyayi, jwalakwe nganakunda. Ana Isaki ni Labeka ŵamkundile mwanagwawo Yakobo kulombela mwali jwa ku Kanani? Iyayi, jemanjaji nganakunda. Ana akumanyilila ligongo lyakwe nganakunda?

Lyaliji ligongo lyakuti ŵandu ku Kanani ŵalambilaga milungu ja unami. Jemanjaji nganaŵa ŵandu ŵambone kulombana nawo, soni nganaŵa ŵandu ŵambone kuŵa nawo paunasi wamnope. Nikuti mpaka tusimicisye kuti Yakobo ngakanasangalala kum’wona mwanagwe jwamkongwe ali mkusyoŵekana ni ŵali ŵa ku Kanani.

Sambano yili yakupikanika kuti Dina ŵacingangene ni yipwetesi. Ana akum’wona jwamlume jwa ku Kanani jwali paciwuliliju, jwakumlolecesya Dina? Lina lyakwe lili Sekemu. Lisiku line Dina ali apite kukunguluka, Sekemu ŵamjigele Dina ni kumkanganicisya kuti agone najo. Yeleyi yaliji yakulemweceka, ligongo ŵandu ŵalombanepe ni ŵakusasosekwa kugona pampepe. Yindu yakulemweceka yaŵatesile Sekemu kwa Dina yatendekasisye yipwetesi yejinji.

Acalumbugwe Dina paŵapikene yayatendekweyo, ŵatumbile mnope. Acalumbugwe ŵaŵili, Simiyoni ni Lefi ŵatumbile mnope mwati ŵajigele maupanga ni kwawula mumsinda mula mwakwasisimucisya acalume ŵa mumsindamo. Jemanjaji yimpepe ni acakuluŵawo ni acapwawo ŵam’wuleje Sekemu ni acalume ŵane wosope. Yakobo ŵatumbile ligongo lya yakusakala yaŵatesile ŵanace ŵakweŵa.

Ana yipwetesiyi yatandite catuli? Yatandite ligongo lyakuti Dina ŵasyoŵekanaga ni ŵandu ŵangapikanila malamusi ga Mlungu. M’weji ngatukusosekwa kusyoŵekana ni ŵandu mpela ŵeleŵa, ngati m’yoyo?