Dina biaba lu guendanagana
Historia 20
Dina biaba lu guendanagana
ÑEE ruuyuʼ tu ra nuu nga zeʼ Dina la? Zigánnabe caadxi baʼdudxaapaʼ de Canaán. Nouʼ ziulaʼdxiʼ bixhózebe ndiʼ la? Ni zacané lii gannuʼ ni nga guietenaláʼdxiluʼ xi guníʼ ique Abraham ne Isaac de ca gunaa de Canaán riʼ.
Gucalaʼdxiʼ Abraham nichaganáʼ Isaac xiiñibe ne ti gunaa de Canaán la? Coʼ. Gucalaʼdxiʼ Isaac ne Rebeca nichaganáʼ Jacob xiiñicabe ne ti gunaa de Canaán la? Coʼ. Nannuʼ xiñee la?
Purtiʼ ca binni de Canaán riʼ la? runi adorarcaʼ dios ni cadi dxandíʼ. Cadi nacháʼhuidicaʼ para gapa binni laacaʼ casi xheelaʼ, ne cadi nacháʼhuidicaʼ para gaca xhamígupeʼ binni laacaʼ. Nga runi zanda guiénenu xiñee Jacob qué ñuuláʼdxidibe ñaca xhamiga xiiñibe ca gunaa de Canaán.
Ya, Dina biuu ra nagana. Ñee zanda guuyuʼ lu dibuju riʼ hombre ni ruyadxí Dina ca la? Labe Siquem. Ti dxi ora yeganna Dina laacabe la? Siquem bicaabe Dina gatané laabe. Cadi jneza diʼ ni guca ca, purtiʼ hombre ne gunaa si ni maʼ bichaganáʼ nga zanda gátacaʼ juntu. Guendaquéiquiiñeʼ ni biʼniʼ Siquem Dina ca la? bedaneni jma guendanagana.
Ora gunna ca bizaʼnaʼ Dina de ni guca ca la? bidxiichicaʼ stale, chupa de laacabe, Simeón ne Leví bidxiichi xhaatacaʼ dede gucuaacaʼ espada ne málasi guyuucabe ndaaniʼ guidxi que. Óraque laacabe ne xcaadxi bíʼchicabe biiticabe Siquem ne guiráʼ ca hombre de raqué. Guendaquéiquiiñeʼ bíʼnicabe riʼ la? bichiichini Jacob bixhózecabe.
Ximodo bizulú guiráʼ guendaquéiquiiñeʼ riʼ yaʼ. Gúcani purtiʼ Dina guca xhamigu binni ni cadi zinanda ley stiʼ Dios. Laanu qué zuyúbidinu gaca xhamígunu binni zacá, njaʼ.
