¿RABILO chú layibu sée Dina saguen la? Láabu sée saguen chop tzón mbioxhlas ni rabés lainy gudx Canaán. Pal Jacob nabiʼ ni cayony Dina, ¿ñoladxbu la? Ni labúu gacné looy guicapylo diitzreʼ láani ngú guisetnaladxlo ni Abrahán né Isaac buny pensary de guirá buñgonaʼ de gudx Canaán.

¿Goniiny Abrahán que xiimbu Isaac nacaʼ toib mbioxhlas de Canaán la? Yaca. ¿Goniiny Isaac né Rebeca que xiimbu Jacob nacaʼ toib mbioxhlas de Canaán la? Yaca. ¿Nanlo xigony la?

Ndeʼ gocni portín guirá buñ de Canaán pór dioxh falz bieenyibu. Diti gocyibu buñguieeu né buñgonaʼ tzaay par gacyibu tzeʼel buñ, né láaca par gacyibu ximigdxin buñ. Por ngú labúu guinino que Jacob diti ñoladxbu que xiindzapbu ñac ximig mbioxhlas ni noʼ lainy gudx Canaán.

Dina riab ló galnagan. ¿Labúu rabilo ló dibuj buñguieeu de Canaán ni cabí a Dina la? Laabu Siquem. Toibtica dzú órni Dina goyee biguen guirá mbioxhlas de Canaán, Siquem gonás lafuers né gotné láabu. Ni bunybu mal gocni portín nosi buñguieeu né buñgonaʼ ni nac tzeʼel ngúsi labúu ratné saʼ. Cós mal ni buny Siquem a Dina goleʼni xiroʼ galnagan.

Órni bisan Dina gon guirá ni góc, nigolú bidzuitzyibu. Chop de layibu Simeón né Leví, nigolú bidzuitz né binéyibu toib espad ni nac xomod machet né bioʼyibu tisintiemp lainy gudxcú. Simeón né Leví né buchyibu bigaityibu Siquem né guirá buñguieeu ni noʼ né láabu. Guirá cós mal ni buny xiin Jacob nigolú bitzuitzni bixiosbu.

¿Ximod gosaló guirá galnagan reʼ? Ndeʼ góc portín Dina bidzak né guirá buñ ni diti bisob ni ná Jehová. Lóono diti guiyopyno buñ de clas cú.