Maana 21nan

Yusufu balimakɛw y’a koniya

E KA cɛnin lajɛ. A dusu kasilen don kosɛbɛ. Cogo si t’a bolo bilen. Yusufu de don. A kɔrɔkɛw y’a feere nin cɛw ma, minnu bɛ ka taa Misira jamana na. Yusufu bɛna kɛ jɔn ye o yɔrɔ la. Mun na Yusufu ni mɔgɔ minnu bɛ fa la, u ye nin juguya sugu kɛ a la? U ye o kɛ, bawo u keleyara a la.

U fa Yakuba tun bɛ Yusufu fɛ kosɛbɛ-kosɛbɛ. Yakuba ye forokiya dɔ kala Yusufu ye min tun cɛ ka ɲi kosɛbɛ, walisa k’a jira ko a b’a fɛ. Kabini a kɔrɔkɛ 10 y’a ye ko Yakuba bɛ Yusufu fɛ kosɛbɛ, u keleyara Yusufu la. U ye Yusufu koniya kosɛbɛ. Nka, ko wɛrɛ fana y’a to u y’a koniya.

Yusufu tun ye sugo fila kɛ. A sugo fila bɛɛ la, a balimakɛw nana u biri a ɲɛkɔrɔ. Yusufu ye o sugo ɲɛfɔ a balimakɛw ye tuma min na, dɔ farala u ka koniya kan ka ɲɛsin a ma.

Don dɔ la, tuma min na Yusufu kɔrɔkɛw taara u fa ka sagaw gɛn, Yakuba ye Yusufu ci a ka taa a balimakɛw cogo filɛ ka na o fɔ a ye. Yusufu kɔrɔkɛw y’a natɔ ye minkɛ, u dɔw ko: ‘An k’a faga!’ Nka, u bɛɛ la kɔrɔbalen, n’o ye Rubɛn ye, o ko: ‘Ayi, aw kana o kɛ!’ U ma Yusufu faga. Nka u ye a minɛ, k’a fili dingɛ dɔ kɔnɔ min ji tun jara. U tilala k’u sigi k’a miiri u bɛna min kɛ a la.

 O waati kelen na, Isumaɛlkaw dɔw tun bɛ ka tɛmɛ. Juda ko a balimakɛw ma: ‘An k’a feere Isumaɛlkaw ma.’ U ye o de kɛ. U ye Yusufu feere warijɛkisɛ 20 na. O tun ye ko kunntanba ye ani juguya tun don.

Yusufu kɔrɔkɛw tun bɛna mun fɔ u fa ye? U ye bakɔrɔ dɔ faga, ka Yusufu ka duloki ɲuman su siɲɛ caman o joli la. O kɔfɛ, u nana o fini jira u fa la, k’a fɔ a ye ko: ‘An ye nin sɔrɔ, a lajɛ ni Yusufu ka fini tɛ.’

Yakuba y’a ye ko Yusufu ka fini don. A kulela, k’a fɔ ko: ‘I b’a sɔrɔ warajugu dɔ de ye Yusufu faga.’ Yusufu kɔrɔkɛw tun b’a fɛ u fa ka o de miiri tigitigi. Yakuba dusu kasira kosɛbɛ yɛrɛ. A ye don caman kɛ kasi la. Nka, Yusufu tun ma sa. Isumaɛlkaw taara ni Yusufu ye yɔrɔ min na, mun ye a sɔrɔ o yɔrɔ la? An k’o lajɛ ɲɔgɔn fɛ.

Jenɛse 37:​1-35.