SE NTE eyeneren oro ọfụhọde onyụn̄ enyenede mbọm. Emi edi Joseph. Nditọ ete esie ẹsụk ẹnyam enye idahaoro ẹnọ irenowo oro ẹsan̄ade ẹka Egypt. Do ẹyenam Joseph edi ofụn. Ntak nditọ ete esie ẹnamde utọ idiọkn̄kpọ emi? Koro mmọ ẹfụbede Joseph.

Ete mmọ Jacob ama ama Joseph ata etieti. Enye okowụt enye ima ke ndinam ẹnam ediye ewụra ẹnọ enye. Ke nditọ ete esie 10 eken ẹkụtde nte Jacob otịmde ama Joseph, mmọ ẹketọn̄ọ ndịfụbe nnyụn̄ nsua Joseph. Edi ntak efen ama odu n̄ko emi mmọ ẹkesuade enye.

Joseph ama adaba ndap iba. Ke ndap Joseph iba emi, nditọete esie ẹma ẹtuak ibuot ẹnọ enye. Ke ini Joseph eketịn̄de mme ndap emi ọnọ nditọ ete esie, usua mmọ ama ọsọn̄ akan.

Ke emi, usen kiet, nte ikpọ nditọ ete Joseph ẹkpemede erọn̄ ete mmọ, Jacob ọdọhọ Joseph aka ekese nte mmọ ẹnamde. Ke ini nditọ ete Joseph ẹkụtde enye edide, usụk mmọ ẹte: ‘Yak iwot enye!’ Edi Reuʹben, andikpon n̄kan ete: ‘Baba, mbufo ẹkunam oro!’ Utu ke oro, mmọ ẹmụm Joseph ẹtop ẹsịn ke obube mmọn̄ oro ama akasat. Ekem mmọ ẹbono ndibiere se ẹdinamde ye enye.

Ke ukem ini emi usụk mme Ishʹma·el·ite ẹsan̄a ẹkpere. Judah ọdọhọ nditọ ete esie ete: ‘Yak inyam enye inọ mme Ishʹma·el·ite.’ Ndien oro ke mmọ ẹnam. Mmọ ẹnyam Joseph ke mbak silver edịp. Nso esuene ye anana ima n̄kpọ ndinam!

Nso ke mmọ ẹdidọhọ ete mmọ? Mmọ ẹwot ebot n̄ko ẹdebi ẹfiak ẹdebi ediye ọfọn̄ Joseph ke iyịp ebot oro. Ndien mmọ ẹda ọfọn̄ oro ẹnyọn̄ ẹkenọ ete mmọ Jacob ẹte: ‘Nnyịn ikọfiọhọ emi. Tịm se mme idịghe ọfọ́n̄ Joseph edi emi.’

Jacob okụt ete enye ke edi. ‘Ana edi idiọk unam ama owot Joseph,’ enye ofiori. Ndien oro edi ukem se nditọ ete Joseph ẹyomde ete mmọ ekere. Jacob ototịm ọfụhọ. Enye atua ke ediwak usen. Edi Joseph ikpaha. Yak ise se itịbede inọ enye ke ebiet ẹdade enye ẹka.