Nọvisunnu Josẹfu Tọn lẹ Gbẹwanna Ẹn
OTÀN 21
Nọvisunnu Josẹfu Tọn lẹ Gbẹwanna Ẹn
PỌ́N lehe visunnu lọ gọ́ na awubla bo jẹflumẹ do sọ. Josẹfu wẹ. Nọvisunnu etọn lẹ ko sà ẹ na dawe he jei Egipti ehelẹ. Josẹfu na lẹzun afanumẹ to finẹ. Naegbọn nọvisunnu-daa etọn lẹ do wà nuylankan ehe? Na yé whànwu Josẹfu wutu wẹ.
Otọ́ yetọn Jakọbu yiwanna Josẹfu taun. E yiwanna ẹn sọmọ bọ e tọ̀ tewu gaa whanpẹnọ de na ẹn. To whenuena mẹdaho Josẹfu tọn 10 lẹ mọ lehe Jakọbu yiwanna ẹn sọ, yé jẹ awuwhàn ji bosọ jẹ wangbẹna Josẹfu ji. Ṣigba whẹwhinwhẹ́n devo sọ tin he wutu yé do gbẹwanna ẹn.
Josẹfu kúdlọ awe delẹ. To odlọ awe lọ lẹpo mẹ, Josẹfu mọ bọ nọvisunnu etọn lẹ litaina ẹn. To whenuena Josẹfu dọ odlọ ehelẹ na nọvisunnu etọn lẹ, wangbẹna yetọn sọ sinyẹn dogọ.
To gbèdopo he mẹdaho Josẹfu tọn lẹ to nukunpedo lẹngbọ otọ́ yetọn tọn lẹ go, Jakọbu biọ to Josẹfu si nado yì pọ́n lehe yé te do. To whenuena mẹdaho Josẹfu tọn lẹ mọ ẹn ja, delẹ to yé mẹ dọmọ: ‘Mì gbọ mí ni hù i!’ Ṣigba Lẹubeni, he yin mẹdaho yemẹpo tọn, dọmọ: ‘Lala, mì wàmọ blo!’ Yé gbọ bo dọ̀n Josẹfu dlan dotọ̀ he ko hú de mẹ. Enẹgodo yé sinai nado magbe nuhe yé na wà na ẹn tọn.
Ojlẹ enẹ mẹ pẹpẹ wẹ dawe Iṣmaelinu delẹ gbọn finẹ wá jei. Juda dọna nọvisunnu-daa etọn lẹ dọmọ: ‘Mì gbọ mí ni sà ẹ na Iṣmaelinu lẹ.’ Podọ nuhe yé wà lọ niyẹn. Yé sà Josẹfu yin fataka-kuẹ 20. Okà nankọ die!
Etẹwẹ nọvisunnu lọ lẹ na dọna otọ́ yetọn? Yé hù gbọgbọẹ de bo ylọn tewu whanpẹnọ Josẹfu tọn do e mẹ whlasusu. Enẹgodo yé hẹn tewu lọ yì na otọ́ yetọn Jakọbu to whégbè bo dọmọ: ‘Nuhe mí mọ die. Pọ́n eyin tewu Josẹfu tọn wẹ.’
Jakọbu mọdọ tewu Josẹfu tọn wẹ. E sọ bẹ avi bo dọmọ: ‘Kanlin ylankan de wẹ na ko hù Josẹfu.’ Podọ nuhe nọvisunnu Josẹfu tọn lẹ jlo dọ otọ́ yetọn ni lẹn lọ pẹpẹ niyẹn. Jakọbu blawu taun. E viavi na azán susu. Ṣigba Josẹfu ma kú gba. Gbọ mí ni pọ́n nuhe jọ do e go to fie ewọ yin hinhẹn yì.
